വാഗമണിലെ ടൂറിസം വികസനം പരിസ്ഥിതിക്ക് വിന

തൃശൂര്‍: വാഗമണ്‍ മേഖലയിലെ വിനോദസഞ്ചാര വികസനം പാരിസ്ഥിതിക ആഘാതം സൃഷ്ടിക്കുന്നുണ്ടെന്ന് തൃശൂര്‍ കേന്ദ്രമായി പ്രവര്‍ത്തിക്കുന്ന സന്നദ്ധ സംഘടനയായ ജനനീതി നടത്തിയ പഠനത്തില്‍ പറയുന്നു.

വാഗമണില്‍ റിസോര്‍ട്ടുകള്‍ പെരുകിവരുന്നതും വിനോദസഞ്ചാരികളുടെ പ്രവാഹം കൂടുന്നതും മലമ്പ്രദേശമായ വാഗമണിന്റെ പാരിസ്ഥിതിക ഘടനയില്‍ പോറലുണ്ടാക്കുന്നുവെന്ന് പഠനത്തില്‍ വ്യക്തമായതായി ജനനീതി എക്സിക്യൂട്ടീവ് ഡയറക്ടര്‍ ജോര്‍ജ് പുളിക്കുത്തിയില്‍ പറഞ്ഞു.

കുന്നിന്‍മുകളിലേക്ക് കയറുന്ന വാഹനങ്ങള്‍ പ്രകൃതിയുടെ നിശബ്ദതയെ ഭേദിക്കുകയും മണ്ണിനെയും പാറക്കെട്ടുകളെ ഇളക്കുകയും ഈ മേഖലയിലെ പരിസ്ഥിതിയെയാകെ ശല്യപ്പെടുത്തുകയും ചെയ്യുന്നു. വിനോദസഞ്ചാര വികസനം നാട്ടുകാരുടെ സ്വൈരജീവിതത്തെയും ബാധിക്കുന്നു.

അധികൃതരുടെ അനുവാദത്തോടെയും അനുവാദമില്ലാതെയും വാഗമണിലെ ഭൂമി കൈയേറുന്നുണ്ട്. പുല്‍ത്തകിടികളും തടാകങ്ങളും ഇവരുടെ കൈയേറ്റം മൂലം അലങ്കോലപ്പെടുന്നു. പുല്‍മേട്ടുകളില്‍ തരിശുനിലമാണെന്ന് പറഞ്ഞാണ് ഇവര്‍ നിര്‍മാണ പ്രവര്‍ത്തനങ്ങള്‍ നടത്തുന്നത്.

ഭൂമി കൈയേറുന്നവര്‍ക്കെതിരെ യാതൊരു നടപടിയും സര്‍ക്കാര്‍ സ്വീകരിക്കുന്നില്ലെന്ന് ജനനീതി ചൂണ്ടിക്കാട്ടുന്നു. റിസോര്‍ട്ടുകളില്‍ നിന്നുള്ള മലിനജലം മീനച്ചിലാറിലേക്ക് ഒഴുകുന്ന അരുവിയിലേക്കാണ് ഒഴുക്കുന്നത്. നദി മലിനീകരണം തടയാനും അധികൃതരുടെ ഭാഗത്തുനിന്ന് നടപടിയൊന്നുമില്ല.

പാരിസ്ഥിതിക ലോലമായ വാഗമണിലേക്ക് വാഹനങ്ങള്‍ വ്യാപകമായി വരുന്നതുമൂലം മണ്ണിളകുകയും ഇത് മണ്ണിടിച്ചിലിനിടയാക്കുകയും ചെയ്യുന്നതായി പഠനത്തില്‍ പറയുന്നു. മീനച്ചിലാര്‍, മണിമലയാര്‍, പെരിയാര്‍ എന്നീ നദികളിലേക്കുള്ള അരുവികള്‍ വരളുന്നതിന് ഇത് കാരണമാവുന്നു.

ആഗോള നിക്ഷേപക സമ്മേളനത്തില്‍ വിദേശത്തുനിന്നുള്ളവര്‍ ഉള്‍പ്പെടെയുള്ള ഗ്രൂപ്പുകള്‍ വാഗമണ്‍ ഒരു ഹോളിസ്റിക് ആരോഗ്യകേന്ദ്രമായി വികസിപ്പിക്കുന്ന പദ്ധതിയില്‍ താത്പര്യം പ്രകടിപ്പിച്ചിരുന്നു. വാഗമണിലെ തുടര്‍ന്നുനടക്കുന്ന വികസന പ്രവര്‍ത്തനങ്ങള്‍ വലിയ പാരിസ്ഥിതിക പ്രത്യാഘാതങ്ങളുണ്ടാക്കുമെന്നാണ് ജനനീതി ചൂണ്ടിക്കാട്ടുന്നത്.