നോട്ടീസ്: പ്രതിപക്ഷം മുഖ്യമന്ത്രിയെ കാണും
തിരുവനന്തപുരം: വക്കം പുരുഷോത്തമനെ സ്പീക്കര് സ്ഥാനത്തു നിന്ന് നീക്കണമെന്ന് പ്രമേയം ചര്ച്ച ചെയ്യുന്നതിനായി നിയമസഭ വിളിച്ചുചേര്ക്കണമെന്ന് പ്രതിപക്ഷനേതാക്കള് ഒക്ടോബര് 27ന് മുഖ്യമന്ത്രി എ. കെ. ആന്റണിയെ നേരില് കണ്ട് ആവശ്യപ്പെടും.
ഒക്ടോബര് 23 വ്യാഴാഴ്ച ചേര്ന്ന ഇടതുമുന്നണി യോഗമാണ് ഇതുസംബന്ധിച്ച തീരുമാനം കൈകൊണ്ടത്. പ്രതിപക്ഷ നേതാവ് വി. എസ്. അച്യുതാനന്ദന്റെ നേതൃത്വത്തിലായിരിക്കും എല് ഡി എഫ് നേതാക്കള് മുഖ്യമന്ത്രിയെ കാണുന്നത്.
നിയമസഭ വിളിച്ചുചേര്ക്കണമെന്ന നോട്ടീസിനെ കുറിച്ച് സര്ക്കാരിന് ഔദ്യോഗികമായ അറിയിപ്പ് ലഭിച്ചിട്ടില്ലെന്ന് കഴിഞ്ഞ ദിവസം മുഖ്യമന്ത്രി വാര്ത്താ സമ്മേളനത്തില് പറഞ്ഞിരുന്നു. ഇതിന്റൈ വെളിച്ചത്തിലാണ് പ്രതിപക്ഷ നേതാക്കള് മുഖ്യമന്ത്രിയെ കാണുന്നത്.
നിയമസഭ വിളിച്ചുകൂട്ടാന് മുഖ്യമന്ത്രി വിസമ്മതിക്കുകയാണെങ്കില് സമരം ആരംഭിക്കാനും ഗവര്ണറെ കാണാനും യോഗം തീരുമാനിച്ചിട്ടുണ്ട്.