വഴിപിരിയല് മാത്രം പരിഹാരം: കടവൂര്
കൊച്ചി: വഴിപിരിയല് മാത്രമേ കോണ്ഗ്രസിലെ പ്രശ്നങ്ങള്ക്കുള്ള പരിഹാരമെന്ന് ഐ ഗ്രൂപ്പ് നേതാവും മന്ത്രിയുമായ കടവൂര് ശിവദാസന്.
ഇനിയൊന്നും പറഞ്ഞിട്ട് കാര്യമില്ലെന്നും ഒട്ടകത്തിന്റെ മുതുക് ഒടിയാന് നേരമായെന്നും കൊച്ചിയിലും പാലക്കാടും ഐ വിഭാഗം ജില്ലാ കണ്വെന്ഷനുകള് ഉദ്ഘാടനം ചെയ്തുകൊണ്ട് കടവൂര് ശിവദാസന് പറഞ്ഞു.
മുഖ്യമന്ത്രിക്കെതിരെ രണ്ടു മന്ത്രിമാര് നാടുനീളെ പ്രസംഗിക്കുകയാണെന്ന് പറയുന്നവര് ധര്മ്മം ഉപദേശിക്കാന് യോഗ്യരല്ല. അപ്പുറത്ത് ഏഴ് മന്ത്രിമാരും ഐക്യം ഉറപ്പിക്കേണ്ട യുഡിഎഫ് കണ്വീനറും കരുണാകരനെ വിമര്ശിച്ച് നടക്കുകയാണ്. ധാര്മ്മികതയും സാങ്കേതികതയുമൊക്കെ അപ്പോഴെന്താ കാശിയ്ക്ക് പോയോ?- കടവൂര് ചോദിച്ചു.
സിപിഎമ്മിനെ എങ്ങിനെ വിശ്വസിക്കുമെന്ന മുഖ്യമന്ത്രിയുടെ സംശയം കോണ്ഗ്രസിന്റെ ദേശീയനയത്തിന് എതിരാണ്. പൊട്ടക്കുളത്തിലെ തവളയുടെ ന്യായമാണത്. എറണാകുളത്ത് പൂജ്യം മാര്ക്ക് വാങ്ങിയ ആന്റണിയുടെ ശൈലി മാറ്റണമെന്ന് ഹൈക്കമാന്റിന് ബോധ്യമായിട്ടുണ്ടെന്നും കടവൂര് പറഞ്ഞു.
കേരളത്തിന്റെ ഭരണക്കസേര പോകാതിരിക്കല് മാത്രമാണ് ചിലരുടെ ലക്ഷ്യം. അതുകൊണ്ടാണ് ഹൈക്കമാന്ഡിന്റെ നിര്ദേശം തള്ളി സിപിഎമ്മിന്റെ കൂടെ ഭരിയ്ക്കാന് പോയതും ഇപ്പോള് ഹൈക്കമാന്റിന്റെ നിര്ദേശം തള്ളി ഭരണത്തില് കടിച്ചുതൂങ്ങാന് ശ്രമിയ്ക്കുന്നതും. - കടവൂര് പറഞ്ഞു.