ഡയറക്ടറുടെ തലയില്‍ കോളയൊഴിച്ചു

തിരുവനന്തപുരം: കോളകളിലെ വിഷാംശം സംബന്ധിച്ച പൂഴ്ത്തിവച്ച റിപ്പോര്‍ട്ടുകള്‍ പുറത്തുവിട്ടില്ലെന്നാരോപിച്ച് യുവജനതാദള്‍ പ്രവര്‍ത്തകര്‍ പരിസ്ഥിതി മലിനീകരണ നിയന്ത്രണ ബോര്‍ഡ് ഡയറക്ടറുടെ തലയിലൂടെ കോളയൊഴിച്ചു.

ഒക്ടോബര്‍ 27 തിങ്കളാഴ്ച തിരുവനന്തപുരത്തെ പരിസ്ഥിതി മലിനീകരണ നിയന്ത്രണ ബോര്‍ഡ് ഓഫീസിലെത്തിയ യുവജനതാദള്‍ പ്രവര്‍ത്തകര്‍ കോളകളിലെ വിഷാംശം സംബന്ധിച്ച പൂഴ്ത്തിവച്ച റിപ്പോര്‍ട്ടുകള്‍ നല്‍കണമെന്ന് ഡയറക്ടര്‍ കെ. വി. ഇന്ദുകുമാറിനോട് ആവശ്യപ്പെട്ടു. റിപ്പോര്‍ട്ടുകളൊന്നും പൂഴ്ത്തിവച്ചിട്ടില്ലെന്നും മാധ്യമങ്ങള്‍ക്ക് നല്‍കിയ റിപ്പോര്‍ട്ടുകള്‍ അവ പ്രസിദ്ധീകരിക്കാത്തതാണെന്നും ഇന്ദുകുമാര്‍ വ്യക്തമാക്കി.

ഇന്ദുകുമാറിന്റെ വിശദീകരണത്തില്‍ തൃപ്തരാവാത്ത യുവജനതാദള്‍ പ്രവര്‍ത്തകര്‍ അരമണിക്കൂറോളം അദ്ദേഹവുമായി വാദപ്രതിവാദത്തില്‍ ഏര്‍പ്പെട്ടു. തുടര്‍ന്ന് രോഷാകുലരായ പ്രവര്‍ത്തകര്‍ കോളക്കുപ്പികള്‍ കൊണ്ടുള്ള മാല അദ്ദേഹത്തെ അണിയിക്കുകയും കോള തലയിലൂടെ ഒഴിക്കുകയും ചെയ്തു. ഓഫീസിലെത്തിയ പൊലീസ് യുവജനതാദള്‍ പ്രവര്‍ത്തകരെ അറസ്റ് ചെയ്തുനീക്കി.