ഹൈക്കമാന്റ് ഇടപെടണം: ഘടകകക്ഷികള്‍

തിരുവനന്തപുരം: കോണ്‍ഗ്രസിലെ വിഭാഗീയതമൂലമുള്ള ഭരണസ്തംഭനം ഇതുപോലെ തുടരാന്‍ അനുവദിയ്ക്കില്ലെന്ന് യുഡിഎഫ് ഘടകക്ഷികള്‍. എത്രയും വേഗം ഇക്കാര്യത്തിന് പരിഹാരം കാണാന്‍ ഹൈക്കമാന്റ് ഇടപെടണമെന്നും യുഡിഎഫ് ഘടകക്ഷികള്‍ ആവശ്യപ്പെട്ടു.

മുസ്ലീംലീഗ് നേതാവും മന്ത്രിയുമായ പി.കെ. കുഞ്ഞാലിക്കുട്ടിയുടെ നേതൃത്വത്തില്‍ കഴിഞ്ഞ ദിവസം യുഡിഎഫ് ഘടകകക്ഷി നേതാക്കള്‍ നടത്തിയ ചര്‍ച്ചയിലാണ് ഈ ആവശ്യം ഉന്നയിക്കാന്‍ തീരുമാനമുണ്ടായത്. പി.കെ. കുഞ്ഞാലിക്കുട്ടി യുഡിഎഫ് ഘടകകക്ഷി നേതാക്കളായ കെ.ആര്‍. ഗൗരിയമ്മ, കെ.എം. മാണി, ആര്‍. ബാലകൃഷ്ണപിള്ള എന്നിവരുമായി ചര്‍ച്ച നടത്തി.

അതിന് ശേഷം കുഞ്ഞാലിക്കുട്ടി യുഡിഎഫ് കണ്‍വീനര്‍ ഉമ്മന്‍ചാണ്ടി, മുഖ്യമന്ത്രി എ.കെ. ആന്റണി എന്നിവരുമായും ചര്‍ച്ചനടത്തി. ഏത് നിലയ്ക്കും ഇന്നത്തെ പ്രതിസന്ധിയുമായി മുന്നോട്ടുപോകാനാവില്ലെന്ന നിലപാടാണ് എല്ലാവര്‍ക്കുമുള്ളതെന്ന് പിന്നീട് കുഞ്ഞാലിക്കുട്ടി വാര്‍ത്താലേഖകരോട് പറഞ്ഞു.