ആന്റണി ദില്ലിയ്ക്ക്

തിരുവനന്തപുരം: അഞ്ച് സംസ്ഥാനങ്ങളിലെ നിയമസഭാതിരഞ്ഞെടുപ്പില്‍ മത്സരിയ്ക്കാനുള്ള കോണ്‍ഗ്രസ് സ്ഥാനാര്‍ത്ഥിപട്ടിക സംബന്ധിച്ച അന്തിമചര്‍ച്ചയ്ക്ക് മുഖ്യമന്ത്രി എ.കെ. ആന്റണി ദില്ലിയ്ക്ക് പോകുന്നു. ഒക്ടോബര്‍ 30 വ്യാഴാഴ്ചയാണ് ആന്റണി ദില്ലിയ്ക്ക് പോകുന്നത്.

പക്ഷെ ഈ യാത്രയില്‍ കേരളത്തിലെ രാഷ്ട്രീയസംഭവവികാസങ്ങള്‍ മുഖ്യചര്‍ച്ചാവിഷയമാകും. എഐസിസി അധ്യക്ഷ സോണിയാഗാന്ധി, കോണ്‍ഗ്രസ് അച്ചടക്കസമിതി അധ്യക്ഷന്‍ എല്‍.പി. സാഹി, കേരളത്തിലെ കോണ്‍ഗ്രസിന്റെ ചുമതലയുള്ള എഐസിസി പ്രതിനിധി അഹമ്മദ് പട്ടേല്‍ എന്നിവരുമായി ആന്റണി ചര്‍ച്ചകള്‍ നടത്തും.

ദില്ലിയില്‍ നടക്കുന്ന ഇന്ദിരാഗാന്ധിസ്മാരക അവാര്‍ഡ് വിതരണച്ചടങ്ങില്‍ അദ്ദേഹം പങ്കെടുക്കും. മടക്കയാത്ര എന്നാണെന്നത് സംബന്ധിച്ച് തീരുമാനമായിട്ടില്ല. നിയമസഭ വിളിച്ചുചേര്‍ക്കണമെന്ന ആവശ്യം ഐഗ്രൂപ്പ് കൂടി ഉന്നയിച്ചതോടെ കേരളത്തിലെ രാഷ്ട്രീയ പ്രതിസന്ധി കൂടുതല്‍ രൂക്ഷമായിരിക്കുകയാണ്. ഈ സന്ദര്‍ഭത്തില്‍ ആന്റണിയുടെ ദില്ലിയാത്രയ്ക്ക് രാഷ്ട്രീയനിരീക്ഷകര്‍ കൂടുതല്‍ ഗൗരവം കല്പിക്കുന്നു.