മുഖ്യമന്ത്രിസ്ഥാനത്ത് തുടരുമെന്ന് ആന്റണി

തിരുവനന്തപുരം: യുഡിഎഫിനെ അട്ടിമറിക്കാനാവില്ലെന്നും മുഖ്യമന്ത്രിയായി തുടരുമെന്നും എ. കെ. ആന്റണി പറഞ്ഞു. .ഒക്ടോബര്‍ 29 ബുധനാഴ്ച മന്ത്രിസഭായോഗത്തിന് ശേഷം വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.

സംസ്ഥാനത്ത് ഭരണസ്തംഭനമുണ്ടെന്ന ആരോപണം അടിസ്ഥാനമില്ലാത്തതാണ്. ഭരണരംഗത്ത് താത്കാലികമായ മങ്ങല്‍ മാത്രമാണുള്ളത്. രാഷ്ട്രീയ ഭിന്നിപ്പ് ഭരണരംഗത്ത് ചില പ്രശ്നങ്ങളുണ്ടാക്കിയിട്ടുണ്ട്.

ഭരണം അട്ടിമറിക്കാന്‍ നടത്തുന്ന ശ്രമങ്ങളുടെ പേരില്‍ സിപിഎം പശ്ചാത്തപിക്കേണ്ടിവരും. ഭരണം അട്ടിമറിക്കാനായി മനപൂര്‍വം പല പ്രശ്നങ്ങളും പ്രതിപക്ഷം ഉണ്ടാക്കുന്നുണ്ട്. ഡിവൈഎഫ്ഐക്കാര്‍ അക്രമമാര്‍ഗത്തിലേക്ക് തിരിയുകയാണ്. അധികാരം അടുത്തെത്തിയെന്ന ധാരണയുടെ അടിസ്ഥാനത്തിലാണ് കുമരകത്തെ റിസോര്‍ട്ട് ഡിവൈഎഫ്ഐക്കാര്‍ അടിച്ചുതകര്‍ത്തത്.

നായനാരുടെ കാലത്തെ പോലെ അക്രമവും ഘൊരാവോയും തിരികെ കൊണ്ടുവരാനുള്ള ശ്രമത്തെ പരാജയപ്പെടുത്തും. സംസ്ഥാനത്ത് ഗുണ്ടാ ആക്ട് നടപ്പിലാക്കുന്നതിനായുള്ള ചര്‍ച്ചകള്‍ തുടരുകയാണ്--- ആന്റണി പറഞ്ഞു.