ഐസക്കും സുധീഷും തമ്മില് വാക്പയറ്റ്
കൊല്ലം: ജനകീയാസൂത്രണത്തിന്റെ പേരില് തോമസ് ഐസക്ക് എംഎല്എയും പാഠം മാസികയില് ജനകീയാത്രൂണത്തെ വിമര്ശിച്ച് ലേഖനമെഴുതിയ പ്രൊഫ. എസ്. സുധീഷും തമ്മില് വാക് പയറ്റ്. ഒരു ഘട്ടത്തില് തര്ക്കം കയ്യാങ്കളിയുടെ വക്കിലെത്തി.
ഒക്ടോബര് 28 ചൊവാഴ്ച കൊല്ലം എസ്എന്കോളെജില് ജനകീയാസൂത്രണത്തിലെ സിഐഎ ബന്ധം: സത്യവും മിഥ്യയും എന്ന സെമിനാറിലാണ് ഈ തര്ക്കങ്ങള് അരങ്ങേറിയത്.
ജനകീയാസൂത്രണത്തില് യാതൊരു സിഐഎ ബന്ധവുമില്ലെന്ന് തോമസ് ഐസക് എംഎല്എ വാദിച്ചു. ജനകീയാസൂത്രണത്തിന്റെ പേരില് ഉണ്ടായ വിവാദം സംസ്ഥാനത്തിന്റെ വികസനത്തിന് തിരിച്ചടിയായി. ജനകീയാസൂത്രണത്തെ വിമര്ശിയ്ക്കുന്നവര് വികേന്ദ്രീകരണത്തെ എതിര്ക്കുന്ന ശക്തികളെ സഹായിക്കുകയാണെന്നും തോമസ് ഐസക് എംഎല്എ വാദിച്ചു.
എന്നാല് ജനകീയസൂത്രണ സങ്കല്പം കേരളത്തിലേക്ക് കൊണ്ട് വന്നത് ഐഎംഎഫ് ആണെന്നും അല്ലാതെ അത് ഇടതുസര്ക്കാരിന്റെ കണ്ടുപിടുത്തമല്ലെന്നും പ്രൊഫ. സുധീഷ് വാദിച്ചു. ജനകീയസൂത്രണ സങ്കല്പം കേരളത്തിന് പരിചയപ്പെടുത്തിയ റിച്ചാര്ഡ് ഫ്രാങ്കി എന്ന വിദേശി സിഐഎ ചാരനാണെന്നും സുധീഷ് പറഞ്ഞു.
ഇരുവരും തമ്മിലുള്ള തര്ക്കം സദസ്സ് പിന്നീട് ഏറ്റെടുത്തു. ചര്ച്ച കേള്ക്കാനെത്തിയ വിദ്യാര്ത്ഥികളും അധ്യാപകരും ചേരിതിരിഞ്ഞതോടെ ഒരു ഘട്ടത്തില് ചര്ച്ച നിയന്ത്രണം വിടുമോ എന്ന ഘട്ടം വരെയെത്തി.