ഭരണം സ്തംഭിച്ചുവെന്ന് മുരളീധരന്‍

തിരുവനന്തപുരം: മുഖ്യമന്ത്രി എന്തൊക്കെ പറഞ്ഞാലും സംസ്ഥാനത്തെ ഭരണം സ്തംഭനാവസ്ഥയിലാണെന്ന് കെപിസിസി പ്രസിഡന്റ് കെ. മുരളീധരന്‍ പറഞ്ഞു.

ഒക്ടോബര്‍ 30 വ്യാഴാഴ്ച വാര്‍ത്താ സമ്മേളനത്തില്‍ സംസാരിക്കുകയായിരുന്നു മുരളീധരന്‍. ഫയലുകള്‍ നീങ്ങാത്ത സ്ഥിതിയാണ് ഭരണരംഗത്തുള്ളത്. സംസ്ഥാനത്ത് ഗുണ്ടാവിളയാട്ടം പെരുകുന്നത് ക്രമസമാധാനം തകര്‍ന്ന നിലയിലാണെന്നതിന് തെളിവാണ്.

തന്റെ മന്ത്രിസഭയിലെ ചില മന്ത്രിമാര്‍ ശത്രുപാളയത്തോട് അടുക്കുന്നവെന്ന് മുഖ്യമന്ത്രി സംശയിക്കുന്നത് മന്ത്രിസഭയ്ക്ക് കൂട്ടുത്തരവാദിത്തം നഷ്ടമായിയെന്നാണ് വ്യക്തമാക്കുന്നത്.

കെ. കരുണാകരന്‍ മുഖ്യമന്ത്രി സ്ഥാനം ഒഴിയേണ്ടിവന്നതു പോലുള്ള സാഹചര്യമാണ് ഇപ്പോഴുള്ളത്. അന്ന് നിയമസഭാകക്ഷിയില്‍ ഭൂരിപക്ഷമുണ്ടായിട്ടും ഘടകകക്ഷികള്‍ എതിരായിരുന്നതിനാലാണ് കരുണാകരന്‍ മുഖ്യമന്ത്രി സ്ഥാനത്തു നിന്ന് മാറിയത്. ഇപ്പോള്‍ ചില ഘടകകക്ഷികള്‍ ആന്റണിയ്ക്കെതിരാണ്.

ഹൈക്കമാന്റ് ഒരു വാക്ക് പറഞ്ഞാല്‍ കോണ്‍ഗ്രസിലെ പ്രശ്നങ്ങള്‍ തീരും. കോണ്‍ഗ്രസില്‍ ഏത് വിഭാഗത്തിനാണ് ഭൂരിപക്ഷമെന്ന് ഇരുവിഭാഗവും സംഘടിപ്പിക്കുന്ന കണ്‍വെന്‍ഷനുകളില്‍ പങ്കെടുക്കുന്ന ആളുകളുടെ എണ്ണം നോക്കിയാല്‍ മതിയാവും- മുരളി പറഞ്ഞു.