തങ്ങളുടെ അന്ത്യശാസനം ഉടന്‍

മലപ്പുറം: ഐക്യമുന്നണിയിലെ പ്രതിസന്ധി ഉടന്‍ പരിഹരിയ്ക്കാന്‍ ആവശ്യപ്പെട്ട് കോണ്‍ഗ്രസ് ഹൈക്കമാന്റിന് മുസ്ലിംലീഗ് നേതാവ് പാണക്കാട് ശിഹാബ് തങ്ങള്‍ അന്ത്യശാസനം നല്കുമെന്നറിയുന്നു.

അടുത്ത രണ്ടുദിവസത്തിനുള്ളില്‍ പാണക്കാട് ശിഹാബ് തങ്ങള്‍ ഈ അന്ത്യശാസനം പ്രഖ്യാപിയ്ക്കുമെന്ന് കരുതുന്നു. ഇനിയും പ്രശ്നം നീട്ടിക്കൊണ്ടുപോയാല്‍ അത് കോണ്‍ഗ്രസിലെ പിളര്‍പ്പിനും അതുവഴി യുഡിഎഫിന്റെ തന്നെ തകര്‍ച്ചയ്ക്കും കാരണമാകുമെന്ന ഭയമാണ് ലീഗിനെ അലട്ടുന്നത്. ഈ സാഹചര്യം ഏത് വിധേനയെയും ഒഴിവാക്കാന്‍ അടിയന്തരമായി ഇടപെടുക എന്നതാണ് ലീഗിന്റെ താല്പര്യം.

ലീഗിന്റെ അഭിപ്രായങ്ങള്‍ ഇ. അഹമ്മദ് പലകുറി കോണ്‍ഗ്രസ് അധ്യക്ഷ സോണിയാഗാന്ധിയെ അറിയിച്ചിരുന്നതാണ്. എന്നാല്‍ ഇക്കാര്യത്തില്‍ ഇതുവരെ അനുകൂല നടപടി ഉണ്ടായിട്ടില്ല എന്നതാണ് ലീഗിന്റെ ആശങ്ക. ഈ സാഹചര്യത്തിലാണ് ഹൈക്കമാന്റിന് പ്രശ്നം പരിഹരിയ്ക്കാന്‍ ഒരു അന്ത്യശാസനം ലീഗിന്റെ ആത്മീയ നേതാവായ പാണക്കാട് തങ്ങള്‍ തന്നെ പുറപ്പെടുവിക്കുമെന്ന് അറിയുന്നത്.