നാല് സംസ്ഥാനങ്ങളില് വോട്ടെടുപ്പ് തുടങ്ങി
ദില്ലി: രാജ്യത്തെ നാല് സംസ്ഥാനങ്ങളിലെ നിയമസഭാ തിരഞ്ഞെടുപ്പിന്റെ വോട്ടെടുപ്പ് തുടങ്ങി. ഡിസംബര് ഒന്ന് തിങ്കളാഴ്ച രാവിലെ എട്ട് മണിയ്ക്ക് തുടങ്ങിയ വോട്ടെടുപ്പ് വൈകീട്ട് അഞ്ച് മണി വരെ നീളും.
ദില്ലി, രാജസ്ഥാന്, മധ്യപ്രദേശ്, ഛത്തീസ്ഗഢ് എന്നീ സംസ്ഥാനങ്ങളിലാണ് തിരഞ്ഞെടുപ്പ് നടക്കുന്നത്. ഒമ്പത് കോടി വോട്ടര്മാരാണ് ഈ നാല് സംസ്ഥാനങ്ങളില് ഉള്ളത്. ഏകദേശം 5,000 സ്ഥാനാര്ത്ഥികള് മത്സരരംഗത്തുണ്ട്. തിങ്കളാഴ്ച തിരുവല്ല നിയമസഭാസീറ്റിനു വേണ്ടിയുള്ള ഉപതിരഞ്ഞെടുപ്പിന്റെ വോട്ടിംഗും തുടങ്ങി.
കനത്ത സുരക്ഷയാണ് എല്ലായിടത്തും ഏര്പ്പെടുത്തിയിട്ടുള്ളത്. നക്സലൈറ്റ് ആക്രമണസാധ്യതയുള്ള ഛത്തീസ്ഗഢും മധ്യപ്രദേശും ഉള്പ്പെടെ നാല് സംസ്ഥാനങ്ങളില് നാല് ലക്ഷത്തോളം പൊലീസിനെയും അര്ധസൈനികവിഭാഗങ്ങളെയും വിന്യസിച്ചിട്ടുണ്ട്.
അടുത്ത വര്ഷത്തെ പൊതുതിരഞ്ഞെടുപ്പിനുള്ള സെമിഫൈനലായാണ് ഈ നിയമസഭാതിരഞ്ഞെടുപ്പുകളെ കാണുന്നത്. ഈ നാല് സംസ്ഥാനങ്ങളും കോണ്ഗ്രസിനെ സംബന്ധിച്ചിടത്തോളം പ്രധാനമാണ്. കാരണം കോണ്ഗ്രസ് അധികാരത്തിലിരിക്കുന്ന സംസ്ഥാനങ്ങളാണിവ.
തിരഞ്ഞെടുപ്പ് സ്വതന്ത്രവും നീതിപൂര്വകവുമാക്കാന് ഏകദേശം 320 നിരീക്ഷകരെയും തിരഞ്ഞെടുപ്പ് കമ്മീഷന് നിയോഗിച്ചിട്ടുണ്ട്. ഡിസംബര് നാലിനാണ് വോട്ടെണ്ണുക.