തിരുവല്ലയില്‍ വോട്ടെടുപ്പ് തുടങ്ങി

തിരുവല്ല: തിരുവല്ല ഉപതിരഞ്ഞെടുപ്പിന്റെ പോളിംഗ് തുടങ്ങി. ഡിസംബര്‍ ഒന്ന് തിങ്കളാഴ്ച രാവിലെ തന്നെ പോളിംഗ് ബൂത്തുകളുടെ മുന്നില്‍ നീണ്ട ക്യൂ ഉണ്ട്.

1.73 ലക്ഷം വോട്ടര്‍മാരാണ് മണ്ഡലത്തിലുള്ളത്. പുരുഷ വോട്ടര്‍മാരേക്കാള്‍ സ്ത്രീ വോട്ടര്‍മാരാണ് മണ്ഡലത്തില്‍ കൂടുതലായുള്ളത്. ഇക്കുറി 2,000 പുതിയ വോട്ടര്‍മാരുണ്ട്.

യുഡിഎഫ് സ്ഥാനാര്‍ത്ഥി എലിസബത്ത് മാമ്മനും എല്‍ഡിഎഫ് സ്ഥാനാര്‍ത്ഥി വര്‍ഗ്ഗീസ് ജോര്‍ജ്ജും തമ്മിലാണ് പ്രധാനമത്സരം. ഐ ഗ്രൂപ്പുകാര്‍ 12,000 വോട്ടുകള്‍ എതിരാളികള്‍ക്ക് മറിച്ചു നല്കുമെന്നാണ് ഭീഷണിപ്പെടുത്തിയിട്ടുള്ളത്. കഴിഞ്ഞ തവണ അന്തരിച്ച മാമ്മന്‍മത്തായി എംഎല്‍എ 10,000 വോട്ടുകളുടെ ഭൂരിപക്ഷത്തിന് ജയിച്ച മണ്ഡലമാണ്. ഇക്കുറി ബിജെപി സ്ഥാനാര്‍ത്ഥി ഇവിടെ കേന്ദ്ര മന്ത്രി പി.സി. തോമസിന്റെ പാര്‍ട്ടിയായ ഐഎഫ്ഡിപിയുടെ പിന്തുണയോടെ മത്സരിയ്ക്കുന്നു എന്ന പ്രത്യേകതയും ഉണ്ട്.

എ ഗ്രൂപ്പിന്റെ 50 എംഎല്‍എമാര്‍ സ്ക്വാഡ് പ്രചാരണത്തിന് രംഗത്തുണ്ട്.