ഘടകകക്ഷികള്‍ക്ക് ഇടപെടാം: ഐ ഗ്രൂപ്പ്

തിരുവനന്തപുരം: കോണ്‍ഗ്രസിലെ പ്രതിസന്ധി സംബന്ധിച്ച വിഷയത്തില്‍ യുഡിഎഫിലെ മറ്റ് ഘടക കക്ഷികള്‍ക്കും ഇടപെടാവുന്നതാണെന്ന് കെപിസിസി ജനറല്‍ സെക്രട്ടറി എന്‍. വേണുഗോപാല്‍ പറഞ്ഞു.

ഡിസംബര്‍ എട്ട് തിങ്കളാഴ്ച വാര്‍ത്താ സമ്മേളനത്തില്‍ സംസാരിക്കുകയായിരുന്നു വേണുഗോപാല്‍.

1995 ല്‍ കരുണാകരനെ മുഖ്യമന്ത്രി സ്ഥാനത്തു നിന്ന് നീക്കുന്നതിന് മുമ്പ് എല്ലാ ഘടക കക്ഷി നേതാക്കളെയും ദില്ലിയിലെത്തിച്ചത് ആരും മറയ്ക്കരുത്. അന്ന് കോണ്‍ഗ്രസിലെ പ്രശ്നത്തില്‍ ഘടക കക്ഷികള്‍ ഇടപെട്ടതു പോലെ ഇപ്പോഴും ഇടപെടാവുന്നതാണ്. കോണ്‍ഗ്രസിലെ ആഭ്യന്തരകാര്യങ്ങളില്‍ ഘടക കക്ഷികള്‍ ഇടപെടേണ്ടെന്ന മന്ത്രി എം. എം. ഹസ്സന്റെ പ്രസ്താവനയോട് പ്രതികരിക്കുകയായിരുന്നു വേണുഗോപാല്‍.

കെപിസിസി പ്രസിഡന്റ് കെ. മുരളീധരനെതിരെ മന്ത്രി എം. വി. രാഘവന്‍ നടത്തിയ പരാമര്‍ശത്തെ വേണുഗോപാല്‍ നിശിതമായി വിമര്‍ശിച്ചു. മുരളിയ്ക്കെതിരെ അത്തരം പ്രസ്താവനകള്‍ ഉന്നയിക്കാന്‍ രാഘവന് അവകാശമില്ലെന്ന് വേണുഗോപാല്‍ പറഞ്ഞു.