മാണിയുടെ ആവശ്യം ചര്‍ച്ചചെയ്യാം: ഉമ്മന്‍ചാണ്ടി

കൊച്ചി: കേരള കോണ്‍ഗ്രസ് പിള്ള, ജേക്കബ് ഗ്രൂപ്പുകളെ യുഡിഎഫില്‍ നിന്ന് പുറത്താക്കണമെന്ന മാണി ഗ്രൂപ്പിന്റെ ആവശ്യം മുന്നണിയില്‍ ഉന്നയിച്ചാല്‍ ചര്‍ച്ച ചെയ്യാമെന്ന് യുഡിഎഫ് കണ്‍വീനര്‍ ഉമ്മന്‍ചാണ്ടി.

ഇത്തരമൊരു ആവശ്യം മുന്നണിയില്‍ ഇതുവരെ ഉന്നയിക്കപ്പെട്ടിട്ടില്ലെന്നും ചര്‍ച്ച ചെയ്യേണ്ട വേദിയില്‍ ഉന്നയിക്കപ്പെട്ടാല്‍ കൂട്ടായി ചര്‍ച്ച ചെയ്യാവുന്നതാണെന്നും ഉമ്മന്‍ചാണ്ടി വ്യക്തമാക്കി.

അതേ സമയം കേരള കോണ്‍ഗ്രസ് പിള്ള, ജേക്കബ് ഗ്രൂപ്പുകള്‍ ലയിക്കാനുള്ള നീക്കം ഏതെങ്കിലും ഗൂഢാലോചനയുടെ ഭാഗമാണെന്ന് കരുതുന്നില്ലെന്നും യുഡിഎഫ് കണ്‍വീനര്‍ പറഞ്ഞു.

തിരുവല്ലയില്‍ എന്താണ് നടന്നതെന്ന് തനിക്ക് വ്യക്തമായറിയാം. അത് പുറത്തു പറയുന്നില്ല. തിരുവല്ലയില്‍ ജേക്കബ്, പിള്ള ഗ്രൂപ്പുകള്‍ വിട്ടുനിന്നുവെന്ന ആരോപണത്തെക്കുറിച്ച് അഭിപ്രായം പറയുന്നില്ല. അക്കാര്യം യുഡിഎഫ് യോഗത്തില്‍ പറയും. - ഉമ്മന്‍ചാണ്ടി പറഞ്ഞു.

എ. കെ. ആന്റണിയ്ക്ക് എല്ലാ ഘടക കക്ഷികളുടെയും പിന്തുണയുണ്ട്. നേതൃമാറ്റത്തിന് താനെതിരല്ല. എന്നാല്‍ അത് ജനാധിപത്യപരമായ രീതിയിലായിരിക്കണം. കോണ്‍ഗ്രസില്‍ ഒരു പിളര്‍പ്പ് ഒഴിവാക്കാനാണ് തങ്ങള്‍ ശ്രമിക്കുന്നത്.- ഉമ്മന്‍ചാണ്ടി വ്യക്തമാക്കി.