മറ്റ് ഘടകകക്ഷി നേതാക്കളെയും ദില്ലിക്ക് വിളിച്ചു

ദില്ലി: കേരളത്തിലെ കോണ്‍ഗ്രസിലെ പ്രശ്നങ്ങള്‍ പരിഹരിക്കുന്നതു സംബന്ധിച്ച് യുഡിഎഫിലെ എല്ലാ ഘടക കക്ഷി നേതാക്കളുമായും ചര്‍ച്ച നടത്താന്‍ ഹൈക്കമാന്റ് തീരുമാനിച്ചു.

മുസ്ലിം ലീഗ്, കേരള കോണ്‍ഗ്രസ് (എം) നേതാക്കളുമായി ഹൈക്കമാന്റ് ചര്‍ച്ച നടത്തിയിരുന്നു. മറ്റ് ഘടക കക്ഷി നേതാക്കളെയാണ് ചര്‍ച്ചയ്ക്കായി ദില്ലിയിലേക്ക് വിളിച്ചിരിക്കുന്നത്.

മന്ത്രിമാരായ കെ. ആര്‍. ഗൗരിയമ്മ, ടി. എം. ജേക്കബ് എന്നിവരുമായി എഐസിസി ജനറല്‍ സെക്രട്ടറി അഹമ്മദ് പട്ടേല്‍ ടെലഫോണില്‍ ചര്‍ച്ച നടത്തി. മറ്റ് ഘടക കക്ഷി നേതാക്കളെ ദില്ലിയിലേക്ക് വിളിപ്പിച്ചിട്ടുണ്ട്.

ആര്‍. ബാലകൃഷ്ണപിള്ള, ടി. എം. ജേക്കബ്, എ. വി. താമരാക്ഷന്‍, ജെ എസ് എസ് പ്രതിനിധി എ. എന്‍. രാജന്‍ ബാബു എന്നിവര്‍ ഡിസംബര്‍ 28ന് ദില്ലിയിലേക്ക് പോവും. 31ന് ശേഷം മാത്രമേ തനിക്ക് ദില്ലിയിലെത്താനാവൂവെന്ന് എം. വി. രാഘവന്‍ ഹൈക്കമാന്റിനെ അറിയിച്ചിട്ടുണ്ട്.

കേരളത്തിലെ പ്രശ്നങ്ങള്‍ പരിഹരിക്കുന്നതിന് നിയോഗിക്കപ്പെട്ട എഐസിസി മൂന്നംഗ സമിതിയിലെ അംഗങ്ങളായ പ്രണബ് മുക്കര്‍ജി, ആര്‍. കെ. ധവാന്‍, അഹമ്മദ് പട്ടേല്‍ എന്നിവരും അര്‍ജുന്‍ സിഗും കഴിഞ്ഞ ദിവസം ദില്ലിയില്‍ യോഗം ചേര്‍ന്ന് കേരളത്തിലെ പ്രശ്നങ്ങളെ കുറിച്ച് ചര്‍ച്ച ചെയ്തിരുന്നു. ഈ യോഗത്തിലാണ് യുഡിഎഫിലെ എല്ലാ ഘടക കക്ഷികളുമായും ചര്‍ച്ച നടത്താന്‍ തീരുമാനിച്ചത്.