നേതൃമാറ്റം ഉടന്‍ ഉണ്ടാവണം: മുരളി

ദില്ലി: കേരളത്തില്‍ ഉടന്‍ നേതൃമാറ്റം നടത്തണമെന്ന് കെപിസിസി പ്രസിഡന്റ് കെ. മുരളീധരന്‍ ഹൈക്കമാന്റിനോട് ആവശ്യപ്പെട്ടു.

ഡിസംബര്‍ 23 ചൊവാഴ്ച രാത്രി എഐസിസി ജനറല്‍ സെക്രട്ടറി അഹമ്മദ് പട്ടേലിനെ സന്ദര്‍ശിച്ചാണ് മുരളി നേതൃമാറ്റം ഉടന്‍ വേണമെന്ന ആവശ്യം ആവര്‍ത്തിച്ചത്.

കേരളത്തില്‍ ക്രമസമാധാനം തകര്‍ന്നിരിക്കുകയാണെന്ന് മുരളി ചൂണ്ടിക്കാട്ടി. ബ്ലേഡ് കമ്പനിയുടെ ഗുണ്ടകള്‍ ഗര്‍ഭിണിയായ യുവതിയുടെ മുടി മുറിച്ച സംഭവം ഇതിനുദാഹരണമാണെന്ന് പറഞ്ഞ മുരളി ഇതുസംബന്ധിച്ച വാര്‍ത്തയുടെ പകര്‍പ്പുകള്‍ അഹമ്മദ് പട്ടേലിന് നല്‍കി.

എല്ലാ ഘടക കക്ഷികളെയും ദില്ലിക്ക് ചര്‍ച്ചയ്ക്കായി വിളിച്ച സാഹചര്യത്തില്‍ കേരളത്തിലെ കോണ്‍ഗ്രസിലെ പ്രശ്നങ്ങള്‍ താമസിയാതെ പരിഹരിക്കുമെന്നാണ് പ്രതീക്ഷയെന്ന് മുരളി മാധ്യമ പ്രവര്‍ത്തകരോട് പറഞ്ഞു.