ഐ ഗ്രൂപ്പ് യോഗം തിങ്കളാഴ്ച വൈകീട്ട്
തിരുവനന്തപുരം: ഹൈക്കമാന്റ് തീരുമാനങ്ങളോട് എങ്ങിനെ പ്രതികരിയ്ക്കണമെന്ന് നിലപാടെടുക്കാന് കോണ്ഗ്രസ്സിലെ ഐ ഗ്രൂപ്പിന്റെ നേതൃയോഗം ഡിസംബര് 29 തിങ്കളാഴ്ച വൈകിട്ട് ചേരും. സത്യന് മെമ്മോറിയല് ഹാളില് വൈകിട്ട് അഞ്ചിന് നടക്കുന്ന യോഗത്തില് കെ.കരുണാകരനും പങ്കെടുക്കും.
ഘടകകക്ഷികളുമായി ഹൈക്കമാന്റ് ചര്ച്ചകള് നടത്തുന്നത് ഐ ഗ്രൂപ്പ് ക്യാമ്പില് ആവേശമുണ്ടാക്കിയിട്ടുണ്ട്. കരുണാകരന് അനുകൂലമായി ഘടകകക്ഷികള് സംസാരിക്കുന്നത് ഏറെ പ്രതീക്ഷയോടെയാണ് ഐ ഗ്രൂപ്പ് നേതൃത്വം വീക്ഷിക്കുന്നത്.
കെപിസിസി ഭാരവാഹികള്, ഡിസിസി ഭാരവാഹികള്, ജില്ലകളില്നിന്നുള്ള പ്രത്യേക ക്ഷണിതാക്കള് എന്നിവരാണ് പങ്കെടുക്കുക. ആന്റണിയെ നേതൃസ്ഥാനത്തുനിന്ന് നീക്കുക എന്ന ഉദ്ദേശ്യത്തോടെ നടത്തുന്ന നീക്കങ്ങള്ക്ക് ഇനി എന്തൊക്കെ ഒരുക്കങ്ങള് നടത്തണം എന്ന കാര്യമാണ് പ്രധാനമായും ഈ യോഗംകൊണ്ട് ഉദ്ദേശിക്കുന്നത്.
സോണിയാഗാന്ധിയുടെ മുംബൈയിലെ പ്രസ്താവനയും ഐ ഗ്രൂപ്പിന് ആവേശമുണ്ടാക്കിയിട്ടുണ്ട്. തങ്ങള്ക്കെതിരെ ഇപ്പോഴത്തെ സാഹചര്യത്തില് ശിക്ഷാനടപടികള്ക്ക് സാധ്യതയില്ലെന്ന കാര്യവും ഐ ഗ്രൂപ്പിന്റെ ആത്മവിശ്വാസം ഉയര്ത്തിയിട്ടുണ്ട്.