ബിഎഡ് കോളജ് അനുവദിച്ചത് സമ്മര്ദം മൂലം
തിരുവനന്തപുരം: വിവിധ കേന്ദ്രങ്ങളില് നിന്നുണ്ടായ കടുത്ത സമ്മര്ദം മൂലമാണ് കൂടുതല് ബിഎഡ് കോളജുകള്ക്ക് അനുമതി നല്കിയതെന്നും സമ്മര്ദം ചെലുത്തിയവര് ഇപ്പോള് തന്നെ വിമര്ശിക്കുകയാണെന്നും വിദ്യാഭ്യാസമന്ത്രി നാലകത്ത് സൂപ്പി പറഞ്ഞു.
സര്ക്കാര് തലത്തിലും രാഷ്ട്രീയ തലത്തിലും കൂടുതല് ബിഎഡ് കോളജുകള് അനുവദിക്കാന് കടുത്ത സമ്മര്ദമാണുണ്ടായത്. 21 ബിഎഡ് കോളജുകള് കൂടി അനുവദിക്കുക മാത്രമേ തനിക്ക് മുന്നില് പോംവഴിയുണ്ടായിരുന്നുള്ളൂ. കൂടുതലായി അനുവദിച്ച 21 കോളജുകളില് അഞ്ചെണ്ണത്തിന് മന്ത്രിസഭയുടെ അംഗീകാരമുണ്ടായിരുന്നു.
കൂടുതല് ബിഎഡ് കോളജുകള് അനുവദിച്ചതില് തനിക്ക് വ്യക്തിപരമായി യാതൊരു താത്പര്യവുമുണ്ടായിരുന്നില്ല. ഈ പ്രശ്നത്തില് തന്നെ ബലിയാടാക്കാനാണ് ചിലരുടെ ശ്രമം. ഇത്തരം കാര്യങ്ങളില് ഇനി സൂക്ഷിച്ചേ ഇടപെടാന് പാടുള്ളൂ എന്ന പാഠമാണ് ഈ പ്രശ്നത്തില് നിന്നും താന് പഠിച്ചത്.
കഴിഞ്ഞ എല്ഡിഎഫ് സര്ക്കാരിന്റെ കാലത്ത് പ്ലസ് ടു സ്കൂള് അനുവദിക്കുന്നതുമായി ബന്ധപ്പെട്ട് നേട്ടമുണ്ടാക്കിയവരാണ് ഇപ്പോള് തനിക്കെതിരെ ശബ്ദമുയര്ത്തുന്നത്. കഴിഞ്ഞ സര്ക്കാരിന്റെ കാലത്ത് പ്ലസ് ടു സ്കൂളുകള് അനുവദിച്ചതില് നിന്ന് വ്യത്യസ്തമായി സുതാര്യമായാണ് ബിഎഡ് കോളജുകള് അനുവദിച്ചത്.