വീണ്ടും രഥയാത്രയുമായി അദ്വാനി

ദില്ലി: തിരഞ്ഞെടുപ്പ് പ്രചാണത്തിന്റെ ഭാഗമായി ഇന്ത്യയുടനീളം രഥയാത്ര നടത്താന്‍ ഉപപ്രധാനമന്ത്രി എല്‍.കെ. അദ്വാനി തീരുമാനിച്ചു. മാര്‍ച്ച് രണ്ട് ചൊവാഴ്ച വാര്‍ത്താസമ്മേളനത്തിലാണ് അദ്വാനി രഥയാത്രയെക്കുറിച്ച് പ്രഖ്യാപനം നടത്തിയത്.

ഇന്ത്യ തിളങ്ങുന്നു എന്ന സന്ദേശമുയര്‍ത്തിക്കൊണ്ടുള്ള ഈ രഥയാത്ര രണ്ടു ഘട്ടങ്ങളിലായാണ് നടത്തുക. യാത്രയുടെ ആദ്യഘട്ടം മാര്‍ച്ച് 10 ന് കന്യാകുമാരിയില്‍ നിന്ന് ആരംഭിയ്ക്കും. രഥയാത്ര തിരുവനന്തപുരം, കോട്ടയം, കൊച്ചി, തൃശൂര്‍, പാലക്കാട് ജില്ലകളിലൂടെ കടന്നുപോകും. ഈ യാത്ര മാര്‍ച്ച് 26ന് അമൃതസറില്‍ സമാപിയ്ക്കും. പിന്നീട് അദ്ദേഹം തിരഞ്ഞെടുപ്പില്‍ മത്സരിയ്ക്കാന്‍ നാമനിര്‍ദേശപത്രിക നല്കും. പാര്‍ട്ടി അനുവദിച്ചാല്‍ ഗുജറാത്തില്‍ നിന്ന് മത്സരിയ്ക്കുമെന്ന് അദ്വാനി പറഞ്ഞു.

രണ്ടാംഘട്ട യാത്ര മാര്‍ച്ച് 30ന് ഗുജറാത്തിലെ പോര്‍ബന്തറില്‍ നിന്ന് തുടങ്ങും. ഈ യാത്ര ഏപ്രില്‍ 14ന് ഒറീസ്സയില്‍ സമാപിയ്ക്കും. റോഡു മാര്‍ഗ്ഗമായിരിക്കും രഥയാത്ര.

വാജ്പേയി സര്‍ക്കാരിന്റെ നേട്ടങ്ങള്‍ അവതരിപ്പിയ്ക്കുന്നതിന് പുറമെ സോണിയാഗാന്ധിയുടെ വിദേശപൗരത്വം, അയോധ്യക്ഷേത്ര നിര്‍മ്മാണം തുടങ്ങിയ വിഷയങ്ങളും അദ്വാനി ഉയര്‍ത്തും.