പൊതുസ്ഥാനാര്ഥി: ബിജെപി സമീപിച്ചില്ലെന്ന് സിപിഎം
തൃശൂര്: വടക്കാഞ്ചേരിയില് കെ. മുരളീധരനെതിരെ പൊതുസ്ഥാനാര്ഥിയെ നിര്ത്താനുള്ള ബിജെപിയുടെ നിര്ദേശം സിപിഎം തള്ളിക്കളഞ്ഞുവെന്ന ബിജെപിയുടെ ആരോപണം ശരിയല്ലെന്ന് സിപിഎം തൃശൂര് ജില്ലാ പ്രസിഡന്റ് ഇ. പി. ജയരാജന് പറഞ്ഞു.
ബിജെപി നേതാക്കളോ അവരുടെ ഏജന്റുമാരോ മുരളിക്കെതിരെ പൊതുസ്ഥാനാര്ഥിയെ നിര്ത്തണമെന്ന നിര്ദേശവുമായി തന്നെ സമീപിച്ചിട്ടില്ല. ബിജെപിയുടെയും സിപിഎമ്മിന്റെയും നയങ്ങളെ കുറിച്ച് അറിയുന്ന ആരും ഈ അടിസ്ഥാനരഹിതമായ ആരോപണങ്ങള് വിശ്വസിക്കില്ല.
മുകുന്ദപുരത്തും വടക്കാഞ്ചേരിയിലും കോണ്ഗ്രസുമായി സിപിഎം രഹസ്യധാരണയിലാണെന്ന ആരോപണം ജയരാജന് നിഷേധിച്ചു. കോണ്ഗ്രസും ബിജെപിയും തമ്മിലുള്ള രഹസ്യധാരണ മറച്ചുവയ്ക്കാനാണ് ഇത്തരം ആരോപണങ്ങള് ഉന്നയിക്കുന്നത്. കോണ്ഗ്രസിന് വോട്ട് കച്ചവടം ചെയ്യുന്നത് തുടരുകയാണെങ്കില് തിരഞ്ഞെടുപ്പിന് ശേഷം ബിജെപിക്ക് പിന്തുണ നഷ്ടപ്പെടും.
എ. കെ. ആന്റണിയുമായി നടത്തിയ ചര്ച്ചകള്ക്ക് ശേഷം ശിവസേന വടക്കാഞ്ചേരിയിലെ സ്ഥാനാര്ഥിയെ പിന്വലിച്ചു. മുരളിയെ സഹായിക്കാനാണ് ശിവസേന സ്ഥാനാര്ഥിയെ പിന്വലിച്ചതെന്ന് വ്യക്തമാണ്.
മുഖ്യമന്ത്രി എ. കെ. ആന്റണിയും വൈദ്യുതിമന്ത്രി കെ. മുരളീധരനും ഉള്പ്പെടെയുള്ള കോണ്ഗ്രസ് നേതാക്കള് തിരഞ്ഞെടുപ്പ് പെരുമാറ്റച്ചട്ടം അനുസരിക്കുന്നില്ല. പ്രചാരണത്തിന് ആരും മൂന്നില് കൂടുതല് വാഹനങ്ങള് ഉപയോഗിക്കാന് പാടില്ലെന്നിരിക്കെ നവോത്ഥാനയാത്രയ്ക്കായി മുഖ്യമന്ത്രി ഡസന് കണക്കിന് കാറുകളാണ് ഉപയോഗിക്കുന്നത്- ജയരാജന് പറഞ്ഞു.
Click it and Unblock the Notifications
Sign in with Google