സി-ഡിറ്റ് മള്‍ട്ടി മീഡിയ ഇന്‍സ്റിറ്റ്യൂട്ട് വരുന്നു

തിരുവനന്തപുരം: സിഡിറ്റ് കേരളത്തിലെ ആദ്യത്തെ മള്‍ട്ടി മീഡിയ സൂപ്പര്‍ സ്പെഷ്യാലിറ്റി ഇന്‍സ്റിറ്റ്യൂട്ടായ കോളജ് ഒഫ് കണ്‍വേജന്‍സ് ആന്റ് എന്റര്‍ടെയ്ന്‍മെന്റ് ടെക്നോളജി സ്ഥാപിക്കുമെന്ന് ഇന്‍ഫര്‍മേഷന്‍ മന്ത്രി എം. എം. ഹസ്സന്‍ അറിയിച്ചു.

സി-ഡിറ്റ് 15 വര്‍ഷം പൂര്‍ത്തിയാക്കിയതിന്റെ ആഘോഷത്തിന്റെ ഭാഗമായാണ് കോളജ് സ്ഥാപിക്കുന്നത്. സിഡിറ്റിന്റെ വാര്‍ഷികാഘോഷം വിവിധ പരിപാടികളോടെ ജൂണ്‍ 18ന് തിരുവല്ലത്ത് നടക്കും. വാര്‍ഷികാഘോഷവുമായി ബന്ധപ്പെട്ട് സി-ഡിറ്റ് 15 പുതിയ പദ്ധതികള്‍ക്ക് തുടക്കമിടും.

സാംസ്കാരികമന്ത്രി ജി. കാര്‍ത്തികേയന്‍ കൂത്തമ്പലത്തിനുള്ള തറക്കല്ലിടും. ആഘോഷത്തിന്റ ഭാഗമായി സ്ഥാപിക്കുന്ന പുതിയ കെട്ടിടത്തിന് ഹസ്സന്‍ തറക്കല്ലിടും. വാര്‍ഷികാഘോഷം ഐടി മന്ത്രി പി. കെ. കുഞ്ഞാലിക്കുട്ടി ഉദ്ഘാടനം ചെയ്യും.

സി-ഡിറ്റ് കഴിഞ്ഞ മൂന്ന് വര്‍ഷമായി ലാഭമുണ്ടാക്കുന്നുണ്ടെന്ന് ഹസ്സന്‍ പറഞ്ഞു. സി-ഡിറ്റ് സര്‍ക്കാരില്‍ നിന്നും സഹായം സ്വീകരിക്കുന്നത് നിര്‍ത്തി. സി-ഡിറ്റിന്റെ വാര്‍ഷിക വരുമാനം ഇപ്പോള്‍ 10 കോടിയാണ്.

ജൂണ്‍ അവസാനത്തോടെ സെക്രട്ടറിയേറ്റിലെ പിആര്‍ ചേംബര്‍ മുഖ്യമന്ത്രി എ. കെ. ആന്റണി ഉദ്ഘാടനം ചെയ്യുമെന്ന് ഹസ്സന്‍ അറിയിച്ചു. എല്ലാ മന്ത്രിമാരും നടത്തുന്ന വാര്‍ത്താ സമ്മേളനങ്ങള്‍ ഇനി ചേംബറില്‍ വച്ചായിരിക്കും നടത്തുന്നത്.