മുരളിയെ അംഗീകരിക്കില്ലെന്ന് കടവൂരും ശങ്കരനും
തിരുവനന്തപുരം: കെ. മുരളീധരനെ ഐ ഗ്രൂപ്പ് നേതാവായി അംഗീകരിക്കില്ലെന്ന് മന്ത്രിമാരായ കടവൂര് ശിവദാസനും പി. ശങ്കരനും കെ. കരുണാകരനെ അറിയിച്ചു.
കെ. കരുണാകരനെ അദ്ദേഹത്തിന്റെ വീട്ടില് ചെന്നു കണ്ടാണ് ഇരുമന്ത്രിമാരും മുരളി ഐ ഗ്രൂപ്പിന്റെ നേതൃത്വം ഏറ്റെടുക്കുന്നതിലെ അതൃപ്തി പ്രകടിപ്പിച്ചത്. കരുണാകരന് തന്നെ ഐ ഗ്രൂപ്പിന്റെ നേതാവായി കാര്യങ്ങള് ഏറ്റെടുത്തു നടത്തണമെന്ന് ഇരുവരും ആവശ്യപ്പെട്ടു.
ഇരുവരും പ്രത്യേകമായാണ് കരുണാകരനുമായി കൂടിക്കാഴ്ച നടത്തിയത്. ബുധനാഴ്ച ചേര്ന്ന ഐ ഗ്രൂപ്പ് യോഗത്തിലെ ചില തീരുമാനങ്ങളിലുള്ള അതൃപ്തി ഇരുവരും കരുണാകരനെ അറിയിച്ചു. ഭൂരിപക്ഷം എംഎല്എമാരുടെ അഭിപ്രായമാണ് താന് അറിയിക്കുന്നതെന്ന് കടവൂര് കരുണാകരനോട് പറഞ്ഞു.
രണ്ടാം നിര നേതാക്കന്മാര് കൂടിയിരുന്ന് മുരളിയുടെ നേതൃത്വത്തില് പ്രവര്ത്തിക്കാന് കരുണാകരന്റെ സാന്നിധ്യത്തില് തീരുമാനിച്ചതിനെ അംഗീകരിക്കിനാവില്ലെന്നാണ് കടവൂര് കരുണാകരനോട് വ്യക്തമാക്കിയത്. ഈ തീരുമാനപ്രകാരം മന്ത്രിമാരുടെയും എംഎല്എമാരുടെയും യോഗം വിളിക്കുന്നതിനോട് യോജിക്കാനാവില്ലെന്നും കടവൂര് വ്യക്തമാക്കി.
അതിനിടെ പത്മജാ വേണുഗോപാലിന്റെ ആശീര്വാദങ്ങളോടെയാണ് കടവൂരും ശങ്കരനും മുരളിയുടെ നേതൃത്വത്തിനെതിരെ തിരിഞ്ഞിരിക്കുന്നതെന്ന് മുരളി വിഭാഗം ആരോപിക്കുന്നു.