ഗാന്ധി,നെഹ്റു ദര്‍ശനങ്ങളെ മറക്കുന്നു: ആന്റണി

കോഴിക്കോട്: മഹാത്മാഗാന്ധിയുടെയും നെഹ്റുവിന്റെയും ദര്‍ശനങ്ങള്‍ക്ക് പഴയതുപോലെ ജനങ്ങളെ സ്വാധീനീക്കാന്‍ കഴിയുന്നില്ലെന്ന് മുഖ്യമന്ത്രി എ. കെ. ആന്റണി പറഞ്ഞു.

ജൂലൈ നാല് ഞായറാഴ്ച കോഴിക്കോട് സ്വാതന്ത്യ്രസമരസേനാനി ടി. പി. കുമാരന്‍ നായരുടെ 60-ാം രക്തസാക്ഷിത്വ വാര്‍ഷികാചരണം ഉദ്ഘാടനം ചെയ്യുകയായിരുന്നു മുഖ്യമന്ത്രി.

സ്വതന്ത്രഭാരതം സൃഷ്ടിക്കാനായി പ്രയത്നിച്ചവരെ ഇന്നത്തെ തലമുറ വിസ്മരിക്കുകയാണ്. ഭൗതികസുഖങ്ങള്‍ക്കായുള്ള പരക്കംപാച്ചിലില്‍ ഭാരതീയ സംസ്കാരത്തേക്കാള്‍ പാശ്ചാത്യ സംസ്കാരത്തെയാണ് അനുകരണീയമായി പുതിയ തലമുറ കാണുന്നത്- ആന്റണി ചൂണ്ടിക്കാട്ടി.

സുജനപാല്‍ എംഎല്‍എ യോഗത്തില്‍ അധ്യക്ഷത വഹിച്ചു. എം. ജി. എസ്. നാരായണന്‍, വത്സന്‍ നെല്ലിക്കോട് തുടങ്ങിയവരും യോഗത്തില്‍ പ്രസംഗിച്ചു.