ഫാന്‍സി നമ്പര്‍ തേടി മമ്മൂട്ടി

കൊച്ചി: നടന്‍ മമ്മൂട്ടി തന്റെ പുതിയ വാഹനത്തിന് ഫാന്‍സി നമ്പര്‍ തേടുന്നു. കെഎല്‍7-എഎസ് എന്ന സീരീസില്‍ 369 എന്ന നമ്പറിന് വേണ്ടിയാണ് മമ്മൂട്ടി കാക്കനാട് റീജ്യണല്‍ ട്രാന്‍സ്പോര്‍ട്ട് ഓഫീസില്‍ അപേക്ഷ നല്കിയിരിക്കുന്നത്.

പക്ഷെ ഒരു പ്രമുഖ സുഗന്ധവ്യഞ്ജനവ്യാപാരക്കമ്പനിയും ഇതേ നമ്പറിന് അപേക്ഷിച്ചിട്ടുണ്ട്. അതിനാല്‍ ജൂലായ് 17ന് ലേലത്തിലൂടെ അധികം തുക നല്കുന്നവര്‍ക്ക് ഈ നമ്പര്‍ കൊടുക്കും.

ഇതേ സീരീസില്‍ 333 എന്ന നമ്പറിന് വേണ്ടിയും ലേലം നടക്കും. രണ്ട് പേരാണ് ഈ നമ്പറിന് അപേക്ഷിച്ചിരിയ്ക്കുന്നത്. മുന്‍ കെപിസിസി വൈസ് പ്രസിഡന്റ് എം.ഐ. ഷാനവാസും മറ്റൊരു വ്യക്തിയും. ഈ നമ്പറിന് വേണ്ടിയുള്ള ലേലം ജൂലായ് 15ന് നടക്കും.