സപ്തംബര് ഒമ്പതിന് ഐ ഗ്രൂപ്പ് യോഗം
തിരുവനന്തപുരം: മന്ത്രിസഭാ വികസനത്തിന്റെ പശ്ചാത്തലത്തില് സപ്തംബര് ഒമ്പതിന് ഐ ഗ്രൂപ്പ് നേതാക്കളുടെ യോഗം നടക്കും.
മന്ത്രിസഭ വികസിപ്പിച്ചപ്പോള് ഗ്രൂപ്പിന്റെ താത്പര്യങ്ങളെ അവഗണിച്ചതില് കടുത്ത പ്രതിഷേധമുള്ള ഐ ഗ്രൂപ്പ് തുടര്ന്ന് സ്വീകരിക്കേണ്ട തന്ത്രങ്ങളെ കുറിച്ച് ആലോചിക്കാനാണ് യോഗം ചേരുന്നത്.
അതിനിടെ മന്ത്രിസഭാ വികസനത്തില് അതൃപ്തിയുള്ള എ ഗ്രൂപ്പിലെ അഞ്ചോളം എംഎല്എമാര് കരുണാകരനുമായി ബന്ധപ്പെട്ടിട്ടുണ്ടെന്നാണ് അറിയുന്നത്. കരുണാകരന്റെ നീക്കങ്ങള്ക്ക് ഇവര് പിന്തുണ പ്രഖ്യാപിച്ചിട്ടുണ്ട്.
മന്ത്രിസഭാ വികസനത്തില് അതൃപ്തിയുള്ള കേരള കോണ്ഗ്രസ് (ബി), കേരള കോണ്ഗ്രസ് (ജേക്കബ്), ആര്എസ്പി-ബി എന്നീ പാര്ട്ടികളിലെ നേതാക്കളും കരുണാകരനുമായി ചേര്ന്ന് നീക്കം നടത്താനാണ് ആലോചിക്കുന്നത്.
അതേ സമയം ഡെപ്യൂട്ടി സ്പീക്കര് സ്ഥാനത്തു നിന്ന് സുന്ദരന് നാടാരെ മാറ്റി ആ സ്ഥാനം ഐ ഗ്രൂപ്പിന് നല്കാന് ചിലര് നീക്കം നടത്തുന്നതായി അറിയുന്നു.