തിരുവനന്തപുരം ദൂരദര്‍ശന്‍ ഡയറക്ടറെ സി ബി ഐ അറസ്റ് ചെയ്തു

തിരുവനന്തപുരം: തിരുവനന്തപുരം ദൂരദര്‍ശന്‍ ഡയറക്ടര്‍ പീര്‍ മുഹമ്മദിനെ സി ബി ഐ അറസ്റ് ചെയ്തു. സെപ്തംബര്‍ 17 വെള്ളിയാഴ്ച രാവിലെ കുടപ്പനക്കുന്നിലെ ദൂരദര്‍ശന്‍ കേന്ദ്രത്തിലെ ഓഫീസിലെത്തിയാണ് സി ബി ഐ അധികൃതര്‍ ഇദ്ദേഹത്തെ അറസ്റ് ചെയ്തത്.

ചോദ്യം ചെയ്യലിനായി ഇദ്ദേഹത്തെ സി ബി ഐ യുടെ കൊച്ചി ഓഫീസിലേയ്ക്ക് കൊണ്ടുപോയിരിയ്ക്കുകയാണ്. വ്യാഴാഴ്ച രാത്രിയില്‍ പീര്‍ മുഹമ്മദിന്റെ വീട്ടില്‍ സി ബി ഐ അധികൃതര്‍ തിരച്ചില്‍ നടത്തിയിരുന്നു.

എന്തിനാണ് അറസ്റ് എന്ന് സി ബി ഐ മാദ്ധ്യമ പ്രവര്‍ത്തകരോട് വിശദീകരിച്ചില്ല. ദൂരദര്‍ശനുമായി ബന്ധപ്പെട്ട അഴിമതിയാണ് അറസ്റിന് കാരണമെന്ന് കരുതുന്നു. പരിപാടികള്‍ കരാറുകാര്‍ക്ക് നല്‍കുന്നതിലും മറ്റും ദൂരദര്‍ശനില്‍ അഴിമതി നടക്കുന്നതായി പരക്കെ പരാതി ഉണ്ട്.