കോണ്‍ഗ്രസിന് സിപിഎമ്മിന്റെ താക്കീത്

ദില്ലി: ഇടതുപാര്‍ട്ടികളും യുപിഎയും തമ്മില്‍ അഭിപ്രായവ്യത്യാസമുള്ള വിഷയങ്ങളില്‍ നയപ്രഖ്യാപനങ്ങള്‍ നടത്തരുതെന്ന് സിപിഎം കേന്ദ്രസര്‍ക്കാരിനോട് ആവശ്യപ്പെട്ടു.

തങ്ങള്‍ക്ക് വിയോജിപ്പുള്ള വിഷയങ്ങളില്‍ നയപ്രഖ്യാപനങ്ങള്‍ നടത്തുമ്പോള്‍ സര്‍ക്കാര്‍ നിലപാടിനോടുള്ള വിയോജിപ്പ് തങ്ങള്‍ക്ക് പരസ്യമായി വ്യക്തമാക്കേണ്ടിവരും. അതൊഴിവാക്കാന്‍ നയപ്രഖ്യാപനങ്ങള്‍ നടത്തുന്നതിന് മുമ്പ് ഇടതുപാര്‍ട്ടികളുമായി ആലോചിക്കുന്നതാണ് ഉചിതം- സിപിഎം പോളിറ്റ് ബ്യൂറോ അംഗവും യുപിഎ-ഇടതുപാര്‍ട്ടി ഏകോപനസമിതി അംഗവുമായ സീതാറാം യെച്ചൂരി പറഞ്ഞു.

പരസ്യമായി സര്‍ക്കാരുമായുള്ള ഭിന്നത അറിയിക്കുന്നത് സര്‍ക്കാരിന് ഗുണം ചെയ്യില്ലെന്ന് അദ്ദേഹം ചൂണ്ടിക്കാട്ടി. കഴിഞ്ഞ ദിവസം ചേര്‍ന്ന സിപിഎം പൊളിറ്റ് ബ്യൂറോ യോഗത്തിലാണ് ഈ തീരുമാനം എടുത്തത്.