പ്രതികരണമില്ലാതെ പാണക്കാട്

തിരുവനന്തപുരം: കഴിഞ്ഞ ദിവസം പ്രതിപക്ഷ നേതാവ് വി.എസ്. അച്യുതാനന്ദനെതിരെ എംഎസ്എഫുകാര്‍ നടത്തിയ ആക്രമണത്തെക്കുറിച്ച് പ്രതികരിയ്ക്കാന്‍ മുസ്ലിംലീഗ് നേതാവ് പാണക്കാട് ശിഹാബ് തങ്ങള്‍ തയ്യാറായില്ല.

ഒക്ടോബര്‍ ഒമ്പത് ശനിയാഴ്ച തിരുവനന്തപുരത്ത് ഒരു കെട്ടിടഉദ്ഘാടനച്ചടങ്ങില്‍ പങ്കെടുക്കാനെത്തിയ പാണക്കാട് ശിഹാബ് തങ്ങള്‍ ഇതിനെക്കുറിച്ച് സംസാരിച്ചില്ല. പാണക്കാട് തങ്ങളോട് മാധ്യമപ്രവര്‍ത്തകര്‍ മിനിറ്റുകളോളം പ്രതികരണം ആവശ്യപ്പെട്ടെങ്കിലും പാണക്കാട് പ്രതികരിച്ചില്ല.

അക്രമത്തെക്കുറിച്ച് പൊലീസ് അന്വേഷണം തുടരുകയാണ്. ഇതുവരെ സംഭവവുമായി ബന്ധപ്പെട്ട് ആരെയും അറസ്റ് ചെയ്തിട്ടില്ല.

ഇതിനിടെ ശനിയാഴ്ച മുന്‍മുഖ്യമന്ത്രി എ.കെ. ആന്റണി സിപിഎമ്മുകാര്‍ തല്ലിത്തകര്‍ത്ത മുസ്ലിംലീഗ് തിരുവനന്തപുരം ജില്ലാ ഓഫീസ് സന്ദര്‍ശിച്ചു. തികച്ചും ആസൂത്രിതമായിരുന്നു ഈ ആക്രമണമെന്ന് ഓഫീസ് സന്ദര്‍ശിച്ച എ.കെ. ആന്റണി പറഞ്ഞു. വളരെ ക്രൂരമായിപ്പോയി. വ്യാപകമായ നഷ്ടമുണ്ടായി. കൊടിമരം ഉള്‍പ്പെടെ എല്ലാം നശിപ്പിച്ചു. - ആന്റണി പറഞ്ഞു.

വിഎസിനെതിരെ എംഎസ്എഫുകാര്‍ കരിങ്കൊടി കാണിച്ച സംഭവത്തില്‍ പ്രതിഷേധിച്ച് കൊച്ചിയില്‍ സിപിഎം നേതൃത്വത്തില്‍ പ്രകടനം നടന്നു. ഏരിയാകമ്മറ്റിയുടെ നേതൃത്വത്തിലായിരുന്നു പ്രകടനം.