കേസ് രാഷ്ട്രീയവത്കരിക്കപ്പെട്ടു; കുറ്റം ചെയ്തിട്ടില്ലെന്ന് ലതാ നായര്
അടിമാലി: കേസ് രാഷ്ട്രീയവത്കരിക്കപ്പെട്ട സാഹചര്യത്തില് കോട്ടയത്ത് സുരക്ഷ കിട്ടില്ലെന്ന് ഉറപ്പുള്ളതിനാലാണ് അടിമാലി ജുഡീഷ്യല് ഒന്നാംക്ലാസ് മജിസ്ട്രേട്ട് കോടതിയില് ഹാജരാകുന്നതെന്ന് ലതാ നായര് അഭിഭാഷകന് മുഖേന നല്കിയ അപേക്ഷയില് പറഞ്ഞു.
ഈ കേസ് സംബന്ധിച്ച് പത്രങ്ങള് ഭാവനയ്ക്കനുസരിച്ച് കഥകള് മെനയുകയാണ്. പോലീസ് പറയുന്ന കുറ്റം ചെയ്തിട്ടില്ല. കേസിലെ പെണ്കുട്ടി കൊടുത്ത വിവരങ്ങളുടെ അടിസ്ഥാനത്തിലാണ് തന്നെ പ്രതിയാക്കിയിരിക്കുന്നത്. മാധ്യമങ്ങളില് നിന്നാണ് ഇക്കാര്യം അറിയാന് കഴിഞ്ഞത്. പോലീസിനോടായി ഒന്നും പറയാനില്ല. പല രാഷ്ട്രീയകക്ഷികളും ഈ വിഷയം സ്വന്തം താല്പ്പര്യങ്ങള്ക്കായി വിനിയോഗിക്കുകയാണ്.
ഓരോരുത്തരും അവരവരുടെ ഭാവനയ്ക്കനുസരിച്ച് പുത്തന് കഥകള് സൃഷ്ടിയ്ക്കുകയാണ്. കേരള ഹൈക്കോടതി അന്വേഷണോദ്യോഗസ്ഥര് മുമ്പാകെയോ, കോട്ടയം കോടതിയിലോ ഹാജരാകാന് നിര്ദ്ദേശിച്ചിരുന്നെങ്കിലും സുരക്ഷയ്ക്കു ഭീഷണിയുള്ളതിനാല് അതിനു സാധിക്കുന്നില്ല. മഫ്തിയില് പോലീസ് കോടതി പരിസരത്തുള്ളതായി പത്രങ്ങളില് വാര്ത്തയുണ്ടായിരുന്നു. ഈ സാഹചര്യത്തില് കോട്ടയത്തെ കോടതിയില് ഹാജരാകുക സുരക്ഷിതമായിരുന്നില്ല.
നീതി കിട്ടുമെന്ന ഉറച്ച വിശ്വാസത്തിന്റെ അടിസ്ഥാനത്തിലാണ് അടിമാലി കോടതിയിലെത്തിയത്. കേസന്വേഷിക്കുന്ന പ്രത്യേക അന്വേഷണസംഘം ഒരു കാരണവുമില്ലാതെ പീഡിപ്പിക്കുമെന്നുറപ്പാണ്. ഹൃദ്രോഗിയായ താനിപ്പോള് ചികിത്സയിലാണ്. കേസ് കെട്ടിച്ചമച്ചതാണെങ്കിലും അന്വേഷണവുമായി സഹകരിക്കുമെന്നും അവര് കോടതിയില് ബോധിപ്പിച്ചു.