എം.വി. രാഘവനെതിരെ കോണ്‍ഗ്രസില്‍ നീക്കം

തിരുവനന്തപുരം: സഹകരണ മെഡിക്കല്‍ കോളെജുകളിലെ മാനേജ്മെന്റ് ക്വാട്ടാ പ്രവേശനം വിവാദമായതോടെ എം.വി. രാഘവനെതിരെ കോണ്‍ഗ്രസില്‍ പ്രതിഷേധസ്വരം ശക്തമാകുന്നു.

ടി.എം. ജേക്കബ്ബിനെയും ആര്‍. ബാലകൃഷ്ണപിള്ളയെയും പുറത്താക്കിയതുപോലെ രാഘവനെയും യുഡിഎഫില്‍ നിന്നും പ ുറത്താക്കണമെന്നാണ് കോണ്‍ഗ്രസ് എംഎല്‍എമാരില്‍ ഒരു വിഭാഗം ശക്തമായി വാദിയ്ക്കുന്നത്. ഇക്കഴിഞ്ഞ മന്ത്രിസഭാ പുനസംഘടനസംബന്ധിച്ച യോഗത്തില്‍ തന്നെ രാഘവനെതിരെ ശക്തമായ വിമര്‍ശനം എംഎല്‍എമാര്‍ ഉന്നയിച്ചിരുന്നു.

സഹകരണമെഡിക്കല്‍ കോളെജുകളിലെ മാനേജ്മെന്റ് ക്വാട്ടാപ്രവേശനത്തിനെതിരായ സുപ്രീംകോടതി വിധി മന്ത്രിസഭയുടെ പ്രതിച്ഛായ ജനമധ്യത്തില്‍ കളങ്കപ്പെടുത്തിയെന്ന് കോണ്‍ഗ്രസിലെ ഭൂരിഭാഗം എംഎല്‍എമാരും കരുതുന്നു. പക്ഷെ ഇക്കാര്യത്തില്‍ മുഖ്യമന്ത്രി ഉമ്മന്‍ചാണ്ടി ഇതുവരെ നിലപാട് വ്യക്തമാക്കിയിട്ടില്ല. പിള്ളയ്ക്കും ജേക്കബ്ബിനും പുറമെ മറ്റൊരു ഘടകകക്ഷിയെക്കൂടി പിണക്കണമോ എന്ന ചോദ്യമാണ് ഉമ്മന്‍ചാണ്ടി ഉന്നയിക്കുന്നത്.

അതേ സമയം സഹകരണമെഡിക്കല്‍ കോളെജിലെ പ്രവേശനത്തിന് താന്‍ യുഡിഎഫിന്റെ നയമാണ് പിന്തുടര്‍ന്നതെന്ന് എം.വി. രാഘവന്‍ പറയുന്നു.