ഇന്ത്യന്‍ അമേരിക്കന് യുഎസ്സില്‍ ജയം

വാഷിംഗ്ടണ്‍: യുഎസ് കോണ്‍ഗ്രസ് തിരഞ്ഞെടുപ്പില്‍ ഇന്ത്യന്‍ അമേരിക്കനായ ബോബി ജിണ്ഡാല്‍ വിജയിച്ചു. അഞ്ച് ദശകത്തിനിടെ ആദ്യമായാണ് ഒരു ഇന്ത്യന്‍ അമേരിക്കന്‍ യുഎസ് കോണ്‍ഗ്രസ് തിരഞ്ഞെടുപ്പില്‍ വിജയിക്കുന്നത്.

അഞ്ച് എതിരാളികളെ തോല്പിച്ചാണ് ബോബി ജിണ്ഡല്‍ തിരഞ്ഞെടുപ്പില്‍ വിജയിച്ചത്. യുഎസ് കോണ്‍ഗ്രസിലേക്ക് തിരഞ്ഞെടുക്കപ്പെടുന്ന രണ്ടാമത്തെ ഇന്ത്യന്‍ അമേരിക്കനാണ് ജിണ്ഡല്‍. 1956ല്‍ ദിലീപ് സിംഗാണ് ഇതിന് മുമ്പ് യുഎസ് കോണ്‍ഗ്രസിലേക്ക് തിരഞ്ഞെടുക്കപ്പെട്ട ഇന്ത്യന്‍ അമേരിക്കന്‍.

റിപ്പബ്ലിക്കന്‍ പാര്‍ട്ടിയുടെ സ്ഥാനാര്‍ഥിയായ ജിണ്ഡല്‍ പോള്‍ ചെയ്ത 78 ശതമാനം വോട്ടും നേടി. 2,13,610 വോട്ടുകളാണ് ജിണ്ഡലിന് ലഭിച്ചത്. തൊട്ടടുത്ത എതിര്‍സ്ഥാനാര്‍ഥി ഡെമോക്രാറ്റിക് പാര്‍ട്ടിയിലെ റോയ് ആംസ്ട്രോംഗിന് ഏഴ് ശതമാനം വോട്ട് മാത്രമേ നേടാനായുള്ളൂ.

കഴിഞ്ഞ വര്‍ഷം ഗവര്‍ണര്‍ തിരഞ്ഞെടുപ്പില്‍ മത്സരിച്ച ജിണ്ഡല്‍ റിപ്പബ്ലിക്കന്‍ സ്ഥാനാര്‍ഥിയോട് തോറ്റിരുന്നു. യുഎസ് കോണ്‍ഗ്രസിലേക്കുള്ള കഴിഞ്ഞ തിരഞ്ഞെടുപ്പിലും ജിണ്ഡലിന് പരാജയം നേരിടേണ്ടിവന്നിരുന്നു.

ജിണ്ഡലിന്റെ മാതാപിതാക്കള്‍ യുഎസിലേക്ക് കുടിയേറിയ ഇന്ത്യക്കാരാണ്.