പാഠ്യപദ്ധതി വര്‍ഷംതോറും മാറ്റാന്‍ ആലോചന

തിരുവനന്തപുരം: ശാസ്ത്ര സാങ്കേതിക മേഖലകളിലെ അതിവേഗത്തിലുള്ള മാറ്റങ്ങള്‍ കണക്കിലെടുത്ത് കേരളത്തിലെ വിദ്യാഭ്യാസ മേഖലയിലെ പാഠ്യപദ്ധതികളില്‍ വര്‍ഷംതോറും മാറ്റം വരുത്താന്‍ ആലോചിക്കുന്നതായി മുഖ്യമന്ത്രി ഉമ്മന്‍ചാണ്ടി പറഞ്ഞു.

നവംബര്‍ 16 ചൊവ്വാഴ്ച മന്ത്രിസഭായോഗത്തിന് ശേഷം വാര്‍ത്താസമ്മേളനത്തില്‍ സംസാരിക്കുകയായിരുന്നു ഉമ്മന്‍ചാണ്ടി.

തങ്ങള്‍ക്ക് യോജിച്ച ജീവനക്കാരെ കേരളത്തില്‍ നിന്ന് ലഭിക്കുന്നില്ലെന്ന് ടെക്നോപാര്‍ക്കിലെ മേധാവികളുടെ യോഗത്തില്‍ പരാതി ഉയര്‍ന്നിരുന്നു. കേരളത്തില്‍ പാഠ്യപദ്ധതിയില്‍ മാറ്റം വരുത്തുന്നത് മൂന്ന് വര്‍ഷത്തിലൊരിക്കല്‍ മാത്രമാണ്. ശാസ്ത്രസാങ്കേതിക മേഖലകളില്‍ അതിവേഗത്തിലാണ് മാറ്റങ്ങള്‍ വരുന്നത്. കേരളത്തിലെ വിദ്യാര്‍ഥികള്‍ക്ക് ഈ സാഹചര്യത്തില്‍ മാറ്റങ്ങള്‍ ഉള്‍ക്കൊള്ളാനാവാതെ പോവുന്നു.

സംസ്ഥാനത്തെ വൈസ്ചാന്‍സലര്‍മാരും മറ്റ് വിദ്യാഭ്യാസ വിദഗ്ധരും വ്യവസായ പ്രമുഖരും ഉള്‍പ്പെടുന്ന ഒരു യോഗം വിളിച്ചുകൂട്ടി എല്ലാ വര്‍ഷവും പാഠ്യപദ്ധതിയില്‍ മാറ്റം വരുത്തുന്നതിനെ കുറിച്ച് ചര്‍ച്ച ചെയ്യുമെന്ന് മുഖ്യമന്ത്രി പറഞ്ഞു.