മുഖ്യമന്ത്രി യു.എ.യിലേക്ക്

തിരുവനന്തപുരം: മുഖ്യമന്ത്രി ഉമ്മന്‍ചാണ്ടി 2005 മാര്‍ച്ചില്‍ യു.എ.ഇ സന്ദര്‍ശിക്കും. മൂന്നു ദിവസം അവിടെ തങ്ങുന്ന അദ്ദേഹം വിദേശമലയാളികളുടെ സമ്മേളനമായ സമവായം2005 ഉദ്ഘാടനം ചെയ്യും. മുന്‍മന്ത്രിയും വിദേശമലയാളികളുടെ സംഘടന നോര്‍ക്കയുടെ ചെയര്‍മാനുമായ എം.എം ഹസന്‍ അറിയിച്ചതാണ് ഇക്കാര്യം.

വിദേശമലയാളികളുടെ തൊഴില്‍ പ്രശ്നങ്ങള്‍ ചര്‍ച്ച ചെയ്യുന്നതോടൊപ്പം ഇന്ത്യയില്‍ നിക്ഷേപമിറക്കുന്നതിന് അവരെ പ്രേരിപ്പിക്കുകയും മുഖ്യമന്ത്രിയുടെ യാത്രാഉദ്ദേശ്യമാണ്.

കുറഞ്ഞ ചെലവില്‍ എയര്‍ ഇന്ത്യ ഗള്‍ഫില്‍ നിന്നും കേരളത്തിലേക്കാരംഭിക്കുന്ന സര്‍വീസിന്റെ ഉദ്ഘാടനവും തദവസരത്തിലുണ്ടാകുമെന്നു കരുതുന്നു.

മുഖ്യമന്ത്രിയോടൊപ്പം കേന്ദ്രമന്ത്രി ജഗദീഷ് ടൈറ്റലറും ഇ. അഹമ്മദുമുണ്ടായിരിക്കും. ഗള്‍ഫിലെ ഇന്ത്യന്‍ അംബാസിഡറുമാരുമായും ചര്‍ച്ചകള്‍ നടത്തും.

യാത്രക്കുള്ള തീയതി പിന്നീടു തീരുമാനിക്കും. മുഖ്യമന്ത്രിയെന്ന നിലയ്ക്കുള്ള ഉമ്മന്‍ചാണ്ടിയുടെ ആദ്യ വിദേശ സന്ദര്‍ശനമാണിത്.