ചന്ദനമാഫിയ: ജുഡീഷ്യല്‍ അന്വേഷണം വേണമെന്ന് പിള്ള

പാലക്കാട്: കഴിഞ്ഞ 10 വര്‍ഷത്തെ ചന്ദനകേസുകളെ കുറിച്ചും ചന്ദനമാഫിയയുടെ പ്രവര്‍ത്തനങ്ങളെ കുറിച്ചും ജുഡീഷ്യല്‍ അന്വേഷണം നടത്തണമെന്ന് കേരള കോണ്‍ഗ്രസ് (ബി) ചെയര്‍മാന്‍ ആര്‍. ബാലകൃഷ്ണപിള്ള ആവശ്യപ്പെട്ടു.

കെ. പി. വിശ്വനാഥനെതിരായ ഹൈക്കോടതിയുടെ പരാമര്‍ശം നീക്കിക്കിട്ടാന്‍ സുപ്രിം കോടതിയില്‍ അപ്പീല്‍ നല്‍കാനുള്ള സര്‍ക്കാര്‍ തീരുമാനം പൊതുമുതല്‍ ധൂര്‍ത്തടിക്കലാണെന്ന് പിള്ള പറഞ്ഞു.

മുമ്പ് തനിക്കും കെ. കരുണാകരനും എം. പി. ഗംഗാധരനുമെതിരെ കോടതി പരാമര്‍ശമുണ്ടായപ്പോള്‍ അതിനെതിരെ അപ്പീല്‍ പോയത് സ്വന്തം ചെലവിലായിരുന്നു. സര്‍ക്കാര്‍ അപ്പീല്‍ നല്‍കാനുള്ള തീരുമാനം തെറ്റായ കീഴ്വഴക്കം സൃഷ്ടിക്കും.

ചന്ദനമാഫിയ പ്രവര്‍ത്തിക്കുന്നത് ഭരണത്തിലിരിക്കുന്നവരുടെ അറിവോടെയാണ്. ചന്ദനമാഫിയയെ തടയാന്‍ സര്‍ക്കാര്‍ ശ്രമിക്കുന്നില്ല. മൂന്നാറിലെ ഭൂമി കൈയേറ്റവും അധികാരത്തിലിരിക്കുന്നവരുടെ അറിവോടെയാണ്.

നയപരമായ തീരുമാനങ്ങള്‍ യുഡിഎഫില്‍ ചര്‍ച്ച ചെയ്യാതെയാണ് കൈകൊള്ളുന്നതെന്ന് പിള്ള പറഞ്ഞു.