വല്ലാര്‍പ്പാടം ടെര്‍മിനല്‍ ഈ മാസം ഏറ്റെടുക്കും

കൊച്ചി: വല്ലാര്‍പ്പാടം കണ്ടെയ്നര്‍ ടെര്‍മിനല്‍ ദുബായ് പോര്‍ട്ട്ട്രസ്റ് ഈ മാസം ഔദ്യോഗികമായി ഏറ്റെടുക്കുമെന്ന് കൊച്ചി പോര്‍ട്ട്ട്രസ്റ് ചെയര്‍മാന്‍ ഡോ.ജേക്കബ്ബ് തോമസ് പറഞ്ഞു.

2118കോടി രൂപ ചെലവു വരുന്ന വല്ലാര്‍പ്പാടം പദ്ധതിക്കായി തുടക്കത്തില്‍ 100 കോടിയാണ് ദുബായ് പോര്‍ട്ട്ട്രസ്റ് മുതല്‍മുടക്കുക. പദ്ധതി പൂര്‍ത്തിയായിക്കഴിഞ്ഞാല്‍ 7500 കോടി രൂപയുടെ നിക്ഷേപവും 50,000 പുതിയ തൊഴിലവസരങ്ങളും ലഭ്യമാകുമെന്നാണ് കരുതുന്നത്. ടെര്‍മിനല്‍ നിര്‍മാണം പൂര്‍ത്തിയായിക്കഴിഞ്ഞാല്‍ മൂന്നു ദശലക്ഷം വെസലുകള്‍ ഇവിടെ കൈകാര്യം ചെയ്യാന്‍ സാധിക്കും. ഇതിനായി ദുബായ് പോര്‍ട്ട്ട്രസ്റ് 33.33 ശതമാനം സര്‍ക്കാരിന് നികുതി നല്‍കണം.

നിര്‍മാണം പൂര്‍ത്തിയായിക്കഴിഞ്ഞാല്‍ മറ്റുരാജ്യങ്ങളില്‍ നിന്നും ഇന്ത്യയിലേക്കുള്ള തുറമുഖമായി കൊച്ചിമാറും. ഇപ്പോള്‍ സിംഗപ്പൂര്‍, സലാല, ദുബായ്, ശ്രീലങ്ക തുടങ്ങിയ വിദേശരാജ്യങ്ങളിലൂടെയാണ് ഇന്ത്യയില്‍ നിന്നുള്ള കയറ്റുമതികള്‍ നടക്കുന്നത്. വല്ലാര്‍പ്പാടം ടെര്‍മിനലിലൂടെ കയറ്റിറക്കമതികള്‍ നടത്തിയാല്‍ ഒരു വെസലിന് 300ഡോളറെങ്കിലും ലാഭിക്കാന്‍ സാധിക്കും.

കുറഞ്ഞ ചെലവില്‍ വെള്ളം, വൈദ്യുതി, വാടകസ്ഥലങ്ങള്‍ തുടങ്ങിയവ ലഭ്യമാകുന്നത് കേരളത്തിന്റെ വ്യവസായ സാധ്യതകളെ വര്‍ദ്ധിപ്പിക്കുമെന്നും ജേക്കബ്ബ് തോമസ് പറഞ്ഞു.