ഐ ഗ്രൂപ്പ് യോഗത്തില് അന്തിമതീരുമാനം
തിരുവനന്തപുരം: ഏപ്രില് 25 തിങ്കളാഴ്ച നടക്കുന്ന ഐ ഗ്രൂപ്പ് യോഗത്തില് ഭാവിപരിപാടികളെ കുറിച്ചുള്ള അന്തിമതീരുമാനമുണ്ടായേക്കും. മെയ് ഒന്നിന് നടക്കുന്ന തൃശൂര് കണ്വെന്ഷനില് എടുക്കേണ്ട നിലപാടുകളെ കുറിച്ച് തീരുമാനിക്കുന്നത് തിങ്കളാഴ്ചത്തെ യോഗത്തിലായിരിക്കും.
പുതിയ പാര്ട്ടി രൂപീകരിക്കുന്നതു സംബന്ധിച്ച് അന്തിമതീരുമാനം തിങ്കളാഴ്ചത്തെ യോഗത്തിലുണ്ടാവും. പുതിയ പാര്ട്ടി സംബന്ധിച്ച് ഇതുവരെ കരുണാകരന് പ്രഖ്യാപനമൊന്നും നടത്തിയിട്ടില്ലെങ്കിലും പുതിയ പാര്ട്ടി രൂപീകരിക്കുമെന്ന് വ്യക്തമാക്കിക്കഴിഞ്ഞ മുരളിയുടെ നിലപാടില് നിന്ന് വിഭിന്നമായ തീരുമാനമൊന്നും അദ്ദേഹം സ്വീകരിക്കാന് സാധ്യതയില്ല. പുതിയ പാര്ട്ടിയുടെ പേര്, കൊടി തുടങ്ങിയവ സംബന്ധിച്ച് തിങ്കളാഴ്ചത്തെ യോഗത്തില് മിക്കവാറും തീരുമാനമുണ്ടായേക്കും.
എംഎല്എമാര്ക്ക് അയോഗ്യത കല്പിക്കപ്പെടാത്ത രീതിയിലായിരിക്കണം പുതിയ പാര്ട്ടി രൂപീകരണമെന്നാണ് ഐ ഗ്രൂപ്പിന്റെ തീരുമാനം. അതേ സമയം കരുണാകരന് രാജ്യസഭാംഗത്വം ഒഴിയും. ഇതിനകം അദ്ദേഹം രാജ്യസഭാംഗത്വം രാജിവച്ചതായി അറിയിക്കുന്ന കത്ത് കോണ്ഗ്രസ് നേതൃത്വത്തിന് നല്കിയിട്ടുണ്ടെന്ന് അഭ്യൂഹമുണ്ട്. അതേ സമയം താന് മന്ത്രിസ്ഥാനവും എംഎല്എ സ്ഥാനവും രാജിവച്ചതായുള്ള വാര്ത്ത അടിസ്ഥാനരഹിതമാണെന്ന് എന്. ശക്തന് വ്യക്തമാക്കി.
ഇടതുമുന്നണിയില് ചേരുക എന്ന ലക്ഷ്യത്തോടെയായിരിക്കും പുതിയ പാര്ട്ടി രൂപീകരിക്കുന്നത്. ദേശീയതലത്തില് എന്സിപി പോലുള്ള പാര്ട്ടികളുമായി ധാരണയുണ്ടാക്കാനും ആലോചനയുണ്ട്.