സിപിഎം പോളിറ്റ് ബ്യൂറോ യോഗം തുടങ്ങി

ദില്ലി: സിപിഎം പോളിറ്റ് ബ്യൂറോ യോഗം ജൂലൈ 29 വെള്ളിയാഴ്ച ദില്ലിയില്‍ എ. കെ. ജി ഭവനില്‍ തുടങ്ങി. മലപ്പുറം സംസ്ഥാന സമ്മേളനത്തിന്റെ അവലോകന റിപ്പോര്‍ട്ട് യോഗം ചര്‍ച്ച ചെയ്യും.

അജണ്ടയില്‍ ഇല്ലെങ്കിലും ലാവ്ലിന്‍ വിവാദവും യോഗത്തില്‍ ഉയര്‍ന്നേക്കുമെന്നാണ് സൂചന. ലാവ്ലിന്‍ വിവാദം ചര്‍ച്ച ചെയ്യില്ലെന്ന് ജനറല്‍ സെക്രട്ടറി പ്രകാശ് കാരാട്ട് പറഞ്ഞിട്ടുണ്ടെങ്കിലും യോഗത്തില്‍ പങ്കെടുക്കുന്ന അംഗങ്ങള്‍ പ്രശ്നമുയര്‍ത്തിയാല്‍ ചര്‍ച്ച ഒഴിവാക്കാനാവില്ല. സംസ്ഥാന സമ്മേളനത്തിന്റെ അവലോകന റിപ്പോര്‍ട്ടില്‍ വി. എസ്. അച്യുതാനന്ദനെതിരെ കടുത്ത പരാമര്‍ശങ്ങളുണ്ട്. ഇതിനെ നേരിടാന്‍ വി. എസ് യോഗത്തില്‍ ലാവ്ലിന്‍ പ്രശ്നമുയര്‍ത്തിയേക്കും.

യോഗം നിലവിലുള്ള രാഷ്ട്രീയസ്ഥിതി വിലയിരുത്തുമെന്ന് പോളിറ്റ് ബ്യൂറോ അംഗം എം. കെ. പാന്ഥെ അറിയിച്ചു.

പ്രകാശ് കാരാട്ട്, ജ്യോതിബസു, ബുദ്ധദേവ് ഭട്ടാചാര്യ, സീതാറാം യെച്ചൂരി, വൃന്ദ കാരാട്ട്, പിണറായി വിജയന്‍ തുടങ്ങിയവരും യോഗത്തില്‍ പങ്കെടുക്കുന്നുണ്ട്.