കബനി അപകടം: ആശ്രിതര്‍ക്ക് 25,000 രൂപ സഹായധനം

തിരുവനന്തപുരം: കബനി നദിയിലുണ്ടായ തോണിയപകടത്തില്‍ മരിച്ചവരുടെ ആശ്രിതര്‍ക്ക് 25,000 രൂപ വീതം സര്‍ക്കാര്‍ സഹായധനം നല്‍കും. നവംബര്‍ ഒന്‍പത് ബുധനാഴ്ച ചേര്‍ന്ന മന്ത്രിസഭാ യോഗമാണ് ഈ തീരുമാനമെടുത്തത്. മുഖ്യമന്ത്രി ഉമ്മന്‍ ചാണ്ടി വാര്‍ത്താ സമ്മേളനത്തില്‍ അറിയിച്ചതാണ് ഇക്കാര്യം.

ഞായറാഴ്ച രാവിലെ വയനാട് ജില്ലയിലെ പുല്‍പ്പള്ളിക്കടുത്ത് മരക്കടവിലാണ് തോണി അപകടമുണ്ടായത്. ഒമ്പത് പേര്‍ ഈ അപകടത്തില്‍ മരിച്ചിരുന്നു.

കര്‍ണാടകത്തിലെ മച്ചൂരില്‍ നിന്ന് മരക്കടവിലേക്ക് വന്ന വിവാഹപാര്‍ട്ടിയാണ് അപകടത്തില്‍ പെട്ടത്. മച്ചൂരിലെ വിവാഹത്തില്‍ പങ്കെടുക്കാന്‍ എത്തിയതായിരുന്നു ഇവര്‍. എല്ലാവരും കര്‍ണാടകത്തില്‍ താമസമാക്കിയ മലയാളികളാണ്.