പന്ന്യന്നൂര്‍ ചന്ദ്രന്‍ വധം: വധശിക്ഷ ജീവപര്യന്തമാക്കി

കൊച്ചി: ബിജെപി നേതാവ് പന്ന്യന്നൂര്‍ ചന്ദ്രനെ കൊലപ്പെടുത്തിയ കേസില്‍ പ്രതികളായ നാലു പേര്‍ക്ക് വിധിച്ച വധശിക്ഷ ഹൈക്കോടതി ജീവപര്യന്തമാക്കി ഇളവുചെയ്തു.

ജീവപര്യന്തം കഠിനതടവിനു പുറമെ പ്രതികള്‍10,000 രൂപ വീതം പിഴ നല്‍കാനും സുപ്രിം കോടതി ഉത്തരവിട്ടു. പ്രതികള്‍ക്ക് വധശിക്ഷ വിധിച്ച കണ്ണൂര്‍ ജില്ലാ സെഷന്‍സ് കോടതിയുടെ ഉത്തരവിനെതിരെ നല്‍കിയ പ്രതികള്‍ നല്‍കിയ ഹര്‍ജിയിലാണ് ഹൈക്കോടതിയുടെ വിധി. പ്രതികളുടെ കുടുംബ പശ്ചാത്തലം കണക്കിലെടുത്താണ് ശിക്ഷ ഇളവു ചെയ്തത്.

ഒന്നാം പ്രതി അരയാക്കണ്ടി സുകു എന്ന സുകുമാരന്‍ (39), മൂന്നാം പ്രതി മൈലാട്ടുമ്മല്‍ സുരേന്ദ്രന്‍ (40), നാലാം പ്രതി കൈതയുള്ള പറമ്പത്ത് പ്രേമന്‍(35), അഞ്ചാം പ്രതി കുഞ്ഞുപറമ്പത്ത് പുരുഷു എന്ന പുരുഷോത്തമന്‍ (43) എന്നിവരെയാണ് ജില്ലാ സെഷന്‍സ് കോടതി വധശിക്ഷക്കു വിധിച്ചിരുന്നത്.

കേസ് അപൂര്‍വങ്ങളില്‍ അപൂര്‍വമാണെന്ന കീഴ്ക്കോടതിയുടെ നിരീക്ഷണം ശരിയല്ലെന്നും വധിശിക്ഷയ്ക്ക് പ്രതികള്‍ അര്‍ഹരല്ലെന്നും ജസ്റിസുമാരായ കോശി, ഉദയഭാനു എന്നിവരടങ്ങിയ ഡിവിഷന്‍ ബഞ്ച് വ്യക്തമാക്കി.

ശിക്ഷാ കാലാവധിയ്ക്കിടെ പ്രതികള്‍ക്ക് പരോളോ ഇളവുകളോ നല്‍കരുതെന്ന് സര്‍ക്കാരിനോട് കോടതി ആവശ്യപ്പെട്ടു. ഇത്തരം കേസുകളില്‍ ശിക്ഷിക്കപ്പെടുന്നവരില്‍ നിന്നും 10,000 രൂപ വീതം പിഴയീടാക്കണമെന്ന അഭിപ്രായവും കോടതി നടത്തി.

കേസുമായി ബന്ധപ്പെട്ട് തിരിച്ചറിയല്‍ പരേഡ് നടത്തിയിരുന്നില്ലെന്നും അതിനാല്‍ കുറ്റവിമുക്തരാക്കണമെന്നും ആവശ്യപ്പെട്ടാണ് ചന്ദ്രന്‍ വധക്കേസിലെ പ്രതികള്‍ ഹര്‍ജി നല്‍കിയത്. ഈ വാദം അംഗീകരിക്കാന്‍ കോടതി തയാറായില്ല.