മലങ്കര സഭ മുന്‍ ബാവ ബസേലിയോസ് മാര്‍ത്തോമ മാത്യൂസ് രണ്ടാമന്‍കാലം ചെയ്തു

കോട്ടയം: മലങ്കര ഓര്‍ത്തഡോക്സ് സഭ മുന്‍ കാതോലിക്ക ബാവ ബസേലിയോസ് മാര്‍ത്തോമ മാത്യൂസ് രണ്ടാമന്‍(92) കാലം ചെയ്തു. അദ്ദേഹത്തിന്റെ കബറടക്കം ജനവരി 28 ശനിയാഴ്ച ഉച്ചയ്ക്ക് ഒന്നിന് ശാസ്താംകോട്ട മൗണ്ട് ഹൊറേബ് ആശ്രമ ചാപ്പലില്‍ നടക്കും.

വ്യാഴാഴ്ച വൈകീട്ട് 5.15-ന് കോട്ടയം ദേവലോകം അരമനയില്‍ വച്ചായിരുന്നു ബാവയുടെ അന്ത്യം. ദേവലോകം അരമനയില്‍ പൊതുദര്‍ശനത്തിന് വച്ചതിനുശേഷം ബാവയുടെ ഭൗതിക ശരീരം രാത്രി 11 മണിയോടെ ചുങ്കം പഴയ സെമിനാരിയിലേക്ക് കൊണ്ടുപോയി. ഭൗതിക ശരീരംവെള്ളിയാഴ്ച ഉച്ചക്ക് ഒരുമണിക്ക ആടൂര്‍ , കൊട്ടാരക്കര, കുണ്ടറ വഴി ശാസ്താംകോട്ടയിലേക്ക് കൊണ്ടുപോകും.

ഒക്ടോബര്‍ 31-ന് അനാരോഗ്യത്തെ തുടര്‍ന്നാണ് സഭയുടെ പരമാധ്യക്ഷ സ്ഥാനത്തു നിന്നും ബാവ മാറിയത്.

ബാവയുടെ നിര്യാണത്തിലുള്ള ദുഃഖസൂചകമായി ഓര്‍ത്തഡോക്സ് സഭയുടെ കീഴിലുള്ള വിദ്യാഭ്യാസ സ്ഥാപനങ്ങള്‍ക്ക് വെള്ളി, ശനി ദിവസങ്ങളില്‍ അവധി പ്രഖ്യാപിച്ചിട്ടുണ്ട്.

ബാവയോടുള്ള ആദരസൂചകമായി മൂന്ന് ദിവസം ഓര്‍ത്തഡോക്സ് സഭ വിലാപദിനമായി ആചരിക്കും.