ബിജെപി സംസ്ഥാന സമിതി യോഗം തുടങ്ങി

ആലപ്പുഴ: ബിജെപി സംസ്ഥാന സമിതി യോഗം ഫിബ്രവരി 12 ഞായറാഴ്ച ആലപ്പുഴയില്‍ തുടങ്ങി. മുതിര്‍ന്ന നേതാവ് പി.പി.മുകുന്ദനൊഴികെ എല്ലാ നേതാക്കളും യോഗത്തിനെത്തിയിട്ടുണ്ട്.

മുകുന്ദനെ യോഗത്തിലേയ്ക്ക് ക്ഷണിച്ചില്ലെന്നാണ് അറിയുന്നത്. സമ്മേളനത്തില്‍ മുകുന്ദനെ ക്ഷണിക്കാത്തതിനെ അദ്ദേഹത്തെ അനുകൂലിക്കുന്നവര്‍ എതിര്‍ത്തു.

ദേശീയ നേതാവ് വെങ്കയ്യ നായിഡു വന്നതിനു ശേഷം പതിനൊന്നരയോടെയാണ് യോഗം തുടങ്ങിയത്. ഒ.രാജഗോപാലും സി.കെ.പത്മനാഭനും യോഗത്തിനെത്തിയിട്ടുണ്ട്. ദേശീയ നേതാവ് എല്‍.ഗണേഷും യോഗത്തില്‍ പങ്കെടുക്കുന്നുണ്ട്.

തിരുവനന്തപുരം ഉപതെരഞ്ഞെടുപ്പില്‍ പാര്‍ട്ടിക്കുണ്ടായ തിരിച്ചടിയുമായി ബന്ധപ്പെട്ട അന്വേഷണ റിപ്പോര്‍ട്ട് യോഗം പരിഗണിക്കും. ഈ റിപ്പോര്‍ട്ട് ചര്‍ച്ചക്കു വന്നാല്‍ ശ്രീധരന്‍പിള്ള പക്ഷത്തിനെതിരെ ആഞ്ഞടിക്കാനാണ് മുകുന്ദന്‍ പക്ഷത്തിന്റെ തീരുമാനം.

നിയമസഭാ തെരഞ്ഞെടുപ്പുമായി ബന്ധപ്പെട്ട ചര്‍ച്ചകളാണ് യോഗത്തില്‍ പ്രധാനമായും നടക്കുക. എല്ലാ സീറ്റിലും മത്സരിക്കണോയെന്ന കാര്യം യോഗത്തില്‍ ചര്‍ച്ചക്കു വരും. സാധ്യതയുള്ള 40-50 സീറ്റുകളില്‍ മത്സരിച്ച് ബാക്കിയുള്ള സീറ്റില്‍ മനസാക്ഷി വോട്ട് ചെയ്യുക എന്ന അഭിപ്രായത്തിനാണ് നേതൃത്വത്തിനിടയില്‍ മുന്‍തൂക്കമുള്ളത്. തിങ്കളാഴ്ച യോഗം അവസാനിക്കും.