മഹാജന് അന്ത്യാഞ്ജലി

മുംബൈ: ബിജെപി ദേശീയ ജനറല്‍ സെക്രട്ടറി പ്രമോദ് മഹാജന്റെ സംസ്കാരം മുംബൈയിലെ ശിവാജി പാര്‍ക്കില്‍ നടന്നു. വ്യാഴാഴ്ച ഉച്ചയ്ക്ക് ഒന്നരയോടെയാണ് ശവസംസ്കാര ചടങ്ങുകള്‍ പൂര്‍ത്തിയായത്.

ചിതക്ക് മകന്‍ രാഹുല്‍ തീകൊളുത്തി. ഉപരാഷ്ട്രപതി ഭൈറോണ്‍സിംഗ് ഷെഖാവത്ത്, കേന്ദ്രമന്ത്രി ശരത്പവാര്‍, മുന്‍ പ്രധാനമന്ത്രി എ.ബി.വാജ്പേയി, പ്രതിപക്ഷനേതാവ് എല്‍.കെ.അദ്വാനി, ബിജെപി പ്രസിഡന്റ് രാജ്നാഥ്സിംഗ്, എന്‍ഡിഎ കണ്‍വീനര്‍ ജോര്‍ജ് ഫെര്‍ണാണ്ടസ്, ഗുജറാത്ത് മുഖ്യമന്ത്രി നരേന്ദ്രമോഡി, റിലയന്‍സ് ചെയര്‍മാന്‍ അനില്‍ അംബാനി തുടങ്ങിയവര്‍ ശവസംസ്കാര ചടങ്ങില്‍ പങ്കെടുത്തു.

മകന്‍ രാഹുല്‍ ചിതക്ക് തീകൊളുത്തുമ്പോള്‍ ആദരസൂചകമായി പൊലീസ് ആകാശത്തേക്ക് വെടിവച്ചു. സംസ്കാര ചടങ്ങില്‍ പങ്കെടുക്കാനായി ബിജെപി പ്രവര്‍ത്തകര്‍ ഉള്‍പ്പെടെയുള്ള വന്‍ജനക്കൂട്ടം ശിവാജി പാര്‍ക്കിലെത്തി. സംസ്കാരം നടക്കുമ്പോള്‍ പ്രമോദ് മഹാജന്‍ അമര്‍ഗയാ തുടങ്ങിയ മുദ്രാവാക്യങ്ങള്‍ അന്തരീക്ഷത്തിലുയര്‍ന്നു.