പ്രമുഖ അല്‍ ഖായിദ നേതാവ് കൊല്ലപ്പെട്ടു

ബാഗ്ദാദ്: അല്‍ ഖായിദ നേതാവ് അബു മുസാബ് അല്‍ സര്‍ഖാവി കൊല്ലപ്പെട്ടതായി ഇറാഖ് പ്രധാനമന്ത്രി നൗറി മിലികി ഔദ്യോഗികമായി സ്ഥിരീകരിച്ചു.

സുന്നി വിഭാഗത്തിന്റെ തലവനായിരുന്ന സര്‍ഖാവി ബഖ്യാപയിലുണ്ടായ വ്യോമാക്രമണത്തിലാണ് കൊല്ലപ്പെട്ടത്. ഇറാഖിലെ യുഎസ് സൈനിക കമാന്‍ഡര്‍ ജോര്‍ജ് കേസിയും സര്‍ഖാവിയുടെ മരണ വാര്‍ത്ത സ്ഥിരീകരിച്ചിട്ടുണ്ട്.

മൃതദേഹം ഇയാളുടേതുതന്നെയാണെന്ന് ഉറപ്പുവരുത്താന്‍ കൂടുതല്‍ ഫോറന്‍സിക് പരീശോധനകള്‍ക്ക് വിധേയമാക്കും. ഒസാമ ബിന്‍ ലാദനും മുല്ലാ ഒമറും കഴിഞ്ഞാല്‍ അല്‍ ഖായിദയിലെ പ്രമുഖനായ നേതാവാണ് സര്‍ഖാവി.

അമേരിക്ക പ്രഖ്യാപിച്ചിട്ടുള്ള പിടികിട്ടാപ്പുള്ളികളില്‍ പ്രധാനിയാണ് ജോര്‍ദാന്‍ കാരനായ സര്‍ഖാവി. ഇയാളുടെ തലയ്ക്ക് അമേരിക്ക രണ്ടു കോടി അമ്പതുലക്ഷം രൂപ ഇനാം പ്രഖ്യാപിച്ചിരുന്നു.

അമേരിക്കന്‍ സൈന്യത്തിനെതിരെ ഒളിപ്പോരാട്ടങ്ങള്‍ക്ക് നേതൃത്വം നല്‍കിയിട്ടുള്ള സര്‍ഖാവി 1980കളില്‍ അഫ്ഗാനിസ്ഥാനില്‍ റഷ്യന്‍ സൈന്യത്തിനെതിരെയാണ് തന്റെ പോരാട്ടം ആരംഭിച്ചത്.

2005 നവംബറില്‍ നടന്ന അമ്മാന്‍ ചാവേറാക്രമണത്തിനുപിന്നലും സര്‍ഖാവിയായിരുന്നു. നിരവധി തവണ അമേരിക്കയ്ക്ക് നേരെ ഭീഷണി മുഴക്കിക്കൊണ്ട് സര്‍ഖാവി ചാനലുകളില്‍ പ്രത്യക്ഷപ്പെട്ടിരുന്നു.