സ്മാര്ട്ട് സിറ്റി: ചര്ച്ച തുടങ്ങി
തിരുവനന്തപുരം: സ്മാര്ട്ട് സിറ്റി പദ്ധതിയെക്കുറിച്ച് ദുബായ് ഇന്റര്നെറ്റ് സിറ്റി പ്രതിനിധികളുമായി സര്ക്കാര് ചര്ച്ച തുടങ്ങി.
സംസ്ഥാനത്തെ പ്രതിനിധീകരിച്ച് ഐടി സെക്രട്ടറി ടി.ജി.ടെന്സിംഗ്, മുഖ്യമന്ത്രിയുടെ പ്രിന്സിപ്പല് സെക്രട്ടറി ഷീലാ തോമസ്, മുഖ്യമന്ത്രിയുടെ അഡീഷണല് സെക്രട്ടറി സുരേഷ് കുമാര്, ഐടി വിദഗ്ധനായ തോമസ് ടി.മാത്യു എന്നിവരാണ് ചര്ച്ചയില് പങ്കെടുക്കുന്നത്. ഇന്റര്നെറ്റ് സിറ്റിയെ പ്രതിനിധീകരിച്ച് കമ്പനി ഡയറക്ടര് ഫരീദ് അബ്ദുള് റഹ്മാന് ചര്ച്ചയില് പങ്കെടുക്കുന്നുണ്ട്.
ചര്ച്ച ശനിയാഴ്ചയും തുടരും. ഇന്ഫോ പാര്ക്ക് വിട്ടുകൊടുക്കില്ല, നിര്ദ്ദിഷ്ട സ്മാര്ട്ട് സിറ്റിയുടെ പരിസരത്ത് മറ്റ് ഐടി പാര്ക്കുകള് പാടില്ലെന്ന ഉപാധി അംഗീകരിക്കില്ല, തൊഴിലവസരങ്ങളുടെ കാര്യത്തില് വ്യക്തമായ ഉറപ്പു ലഭിക്കണം, ഐടി കെട്ടിടങ്ങളല്ലാതെ മറ്റ് അപ്പാര്ട്ട്മെന്റുകളും ഹോട്ടലുകളും ക്ലബ്ബുകളും പാടില്ല തുടങ്ങിയവയാണ് സ്മാര്ട്ട് സിറ്റി തുടങ്ങുന്നതിന് സര്ക്കാര് മുന്നോട്ടുവച്ചിരിക്കുന്ന നിബന്ധനകള്. ഇവയിലൂന്നിയായിരിക്കും ചര്ച്ച.