ലോര്‍ഡ് കൃഷ്ണാ ബാങ്ക് ലയിപ്പിക്കുന്നതില്‍ സര്‍ക്കാറിന് എതിര്‍പ്പ്

തിരുവനന്തപുരം: ലോര്‍ഡ് കൃഷ്ണാ ബാങ്ക് സെഞ്ചൂറിയന്‍ ബാങ്ക് ഓഫ് പഞ്ചാബില്‍ ലയിപ്പിക്കുന്നതിനെ സര്‍ക്കാര്‍ എതിര്‍ക്കുമെന്ന് മുഖ്യമന്ത്രി വി.എസ് അച്യുതാനന്ദന്‍ നിയസഭയില്‍ പറഞ്ഞു.

പിസി ജോര്‍ജിന്റെ (കേരള കോണ്‍ഗ്രസ്-സെക്യുലര്‍) സബ്മിഷന് മറുപടി പറയുകയായിരുന്നു അദ്ദേഹം.

കര്‍ഷകരുടെതടക്കം മറ്റെല്ലാരംഗങ്ങളിലും സാമ്പത്തിക ഇടപാടുകള്‍ നടത്തുന്നവരുടെ ആവശ്യങ്ങള്‍ ലോര്‍ഡ് കൃഷ്ണാ ബാങ്ക് തൃപ്തികരമായ രീതിയില്‍ കൈകാര്യം ചെയ്യുന്നുണ്ട്. ഇത്തരമൊരവസരത്തില്‍ മറ്റൊരു ബാങ്കുമായി ലയിപ്പിക്കേണ്ട കാര്യമില്ല. -മുഖ്യമന്ത്രി പറഞ്ഞു.

ഇക്കാര്യം സംബന്ധിച്ച സംസ്ഥാന താല്പര്യത്തെക്കുറിച്ച് കേന്ദ്രധനമന്ത്രി പി.ചിദംബരത്തിന് എഴുതിയിട്ടുണ്ട്. ലയനതീരുമാനം ഉപേക്ഷിച്ച് ഉദ്യോഗസ്ഥരുടെ സമരം അവസാനിപ്പിക്കാന്‍ വഴിയൊരുക്കണമെന്ന് കേന്ദ്രമന്ത്രിയോട് ആവശ്യപ്പെട്ടിട്ടുണ്ട്- മുഖ്യമന്ത്രി വിശദീകരിച്ചു.