സദ്ദാം ഹുസൈനെ തൂക്കിക്കൊല്ലാന്‍ വിധിച്ചു

ബാഗ്ദാദ്: ഇറാഖിന്റെ മുന്‍ പ്രസിഡന്റ് സദ്ദാം ഹുസൈനെ ബാഗ്ദാദിലെ വിചാരണ കോടതി തൂക്കിക്കൊല്ലാന്‍ വിധിച്ചു. സദ്ദാമിന്റെ അര്‍ദ്ധസഹോദരന്‍ ബര്‍സാന്‍ ഇബ്രാഹിമിനും വധശിക്ഷ വിധിച്ചിട്ടുണ്ട്.

ഷിയാകളെ കൂട്ടക്കൊല ചെയ്തതില്‍ സദ്ദാം കുറ്റക്കാരനാണെന്ന് വിചാരണ കോടതി കണ്ടെത്തി. 1982ല്‍ ദുജയ്ല്‍ പട്ടണത്തില്‍ സദ്ദാമിനെതിരെ നടന്ന വധശ്രമത്തിനു ശേഷം 148 ഷിയാകളെ കൂട്ടക്കൊല ചെയ്തതില്‍ സദ്ദാമും മറ്റ് ഏഴ് പ്രതികളും കുറ്റക്കാരാണെന്നാണ് വിചാരണ കോടതിയുടെ വിധി.

എപ്പോഴത്തേതുമെന്ന പോലെ കൂസലില്ലാതെയാണ് സദ്ദാം കോടതി വിധിയെ നേരിട്ടത്. സദ്ദാം ഹുസൈന്‍ ഒരു സൈനികനാണെന്ന് ഓര്‍ക്കണമെന്നും സാധാരണ കുറ്റവാളിയെ പോലെ തൂക്കിക്കൊല്ലുന്നതിന് പകരം സൈനികര്‍ തന്നെ വെടിവച്ചു കൊല്ലുന്നതിലൂടെ വധശിക്ഷ നടപ്പാക്കണമെന്നും സദ്ദാം ആവശ്യപ്പെട്ടു.

വിധിയെ തുടര്‍ന്ന് സംഘര്‍ഷം ഉണ്ടാവാനുള്ള സാഹചര്യം കണക്കിലെടുത്ത് ബാഗ്ദാദിലും മറ്റും ശക്തമായ സുരക്ഷ ഏര്‍പ്പെടുത്തിയിട്ടുണ്ട്.

മൂന്ന് വര്‍ഷം മുമ്പാണ് അമേരിക്കന്‍ സൈനികര്‍ ഒളിസങ്കേതത്തില്‍ നിന്നും സദ്ദാമിനെ പിടികൂടിയത്.