ബാലപീഡനങ്ങള്‍ ഏറ്റവും കുറവ് കേരളത്തില്‍

ദില്ലി: രാജ്യത്തെ ബാല പീഡനങ്ങള്‍ ഏറ്റവും കുറവ് നടക്കുന്ന സംസ്ഥാനം കേരളമെന്ന് കേന്ദ്രസര്‍ക്കാര്‍ റിപ്പോര്‍ട്ട്. 53.22% കുട്ടികള്‍ ലൈംഗിക പീഡനത്തിനിരയാക്കുന്നുവെന്നാണ് റിപ്പോര്‍ട്ട്.

5-12 വയസ്സിനിടെ പ്രായമുളള കുട്ടികളാണ് ഏറ്റവുമധികം പീഡനത്തിനിരയാകുന്നത്. കുട്ടികള്‍ക്കെതിരായ എല്ലാവിധ പീഡനങ്ങളിലും മുന്നിട്ടു നില്‍ക്കുന്ന സംസ്ഥാനം ആന്ധ്രപ്രദേശാണ്.

അസം, ബീഹാര്‍, ദില്ലി എന്നീ സംസ്ഥാനങ്ങളാണ് തൊട്ടുപിറകിലുളളത്. ദില്ലിയില്‍ 87% യുവതികളും ചെറുപ്പക്കാലത്ത് ഏതെങ്കിലും തരത്തിലുളള വൈകാരിക പീഡനത്തിനിരയായവരാണെന്നും റിപ്പോര്‍ട്ട് പറയുന്നു.

48.4 % പെണ്‍കുട്ടികളും ആണ്‍കുട്ടികളായെങ്കില്‍ എന്ന് ആശിക്കുന്നവരാണ്. എങ്കില്‍ പീഡനം കുറയുമെന്നാണ് ഇവരുടെ വിശ്വാസമെന്നും റിപ്പോര്‍ട്ട് പറയുന്നു.

70% പീഡനത്തിനിരയായ കുട്ടികളും ഈ വിവരം വെളിപ്പെടുത്തുന്നില്ല. ശാരീരികപീഡനത്തിനിരയായ 69% കുട്ടികള്‍ 54.68%വും ആണ്‍കുട്ടികളാണ്.

കുട്ടികളെ ലൈംഗികമായി പീഡിപ്പിക്കുന്നത് സംബന്ധിച്ച് ആദ്യമായി സര്‍ക്കാര്‍ തയ്യാറാക്കിയ റിപ്പോര്‍ട്ടിലാണ് ഞെട്ടിക്കുന്ന ഈ വിവരങ്ങളുളളത്. കേന്ദ്ര വനിതാ-ശിശു ക്ഷേമ മന്ത്രി രേണുക ചൗധരിയാണ് റിപ്പോര്‍ട്ട് പുറത്തിറക്കിയത്.

രാജ്യത്തെ 17,000 കുട്ടികള്‍ക്കിടയില്‍ പഠനം നടത്തിയശേഷമാണ് റിപ്പോര്‍ട്ട് തയ്യാറാക്കിയത്. ആണ്‍കുട്ടികളെയും പെണ്‍കുട്ടികളെയും പീഡനത്തിനിരയാക്കുന്നത് അവര്‍ക്ക് പരിചയമുളളവര്‍ തന്നെയാണ് എന്നാണ് പഠനം വെളിപ്പെടുത്തുന്നത്.