സുരക്ഷ: മുംബൈ കോളജുകളില്‍ ക്ലോസ്‌ഡ്‌ സര്‍ക്യൂട്ട്‌ കാമറകള്‍

മുംബൈ: മുംബൈയിലെ മിക്ക കോളജുകളിലെയും വിദ്യാര്‍ത്ഥികള്‍ ആകെ കുടുങ്ങിയിരിക്കുകയാണ്‌. ഇനി പതിവുപോലെ ക്ലാസില്‍ നിന്നും മുങ്ങി കറങ്ങിനടക്കാനും തമാശകള്‍ ഒപ്പിക്കാനും കഴിയില്ല.

എല്ലാ സമയത്തും എല്ലാവരും നിരീക്ഷിക്കപ്പെടുകയാണ്‌. ഒന്നനങ്ങുന്നതും എന്തെങ്കിലും പറയുന്നതും എന്നുവേണ്ട എല്ലാം ക്യാമറക്കണ്ണുകള്‍ ഒപ്പിയെടുക്കുന്നു. ബോംബ്‌ ഭീഷണി, തീവ്രവാദ ഭീഷണി തുടങ്ങിയ സുരക്ഷാ പ്രശ്‌നങ്ങളെത്തുടര്‍ന്നാണ്‌ കോളെജുകിളിലെല്ലാം ക്ലോസ്‌ഡ്‌ സര്‍ക്യൂട്ട്‌ ടിവി ഘടിപ്പിക്കാന്‍ അധികൃതര്‍ തീരുമാനിച്ചത്‌.

കഴിഞ്ഞയാഴ്‌ച സെന്റ്‌ സേവിയേഴ്‌സ്‌ കോളെജിലെ ക്ലാസ്സ്‌ മുറികളിലെല്ലാം ഇത്തരം ടിവി കാമറകള്‍ ഘടിപ്പിക്കുകയും ചെയ്‌തു. സെന്റ്‌ സേവ്യേഴ്‌സ്‌ കോളെജിനെ മാതൃകയാക്കി വില്‍സണ്‍ കോളെജ്‌, നര്‍സീ മന്‍ജീ കോളെജ്‌ എന്നിവയും ക്ലാസ്‌ മുറികളില്‍ ക്ലോസ്‌ഡ്‌ സര്‍ക്യൂട്ട്‌ കാമറകള്‍ ഘടിപ്പിക്കാന്‍ തീരുമാനിച്ചിട്ടുണ്ട്‌.

വ്യാജ ഭീഷണിസന്ദേശങ്ങള്‍ കണ്ടുപിടിക്കുന്നതിനായി സേവ്യേഴ്‌സ്‌ കോളെജില്‍ കാളര്‍ ഐഡികള്‍ ഘടിപ്പിച്ച ഫോണുകളും സ്ഥാപിച്ചു കഴിഞ്ഞു. ഇനി എവിടെനിന്നും സന്ദേശം വന്നാലും ആ നമ്പറുകളും നിരീക്ഷിക്കപ്പെടും.

ഇത്തരം സംവിധാനമുള്ളപ്പോള്‍ തങ്ങള്‍ എപ്പോഴും നിരീക്ഷിക്കപ്പെടുന്നുണ്ടെന്ന ബോധം വിദ്യാര്‍ത്ഥികളിലും അധ്യാപകരിലും ഉണ്ടാകും ഇതുകൊണ്ടുതന്നെ ഒരുവിധം പ്രശ്‌നങ്ങളെയെല്ലാം ഇല്ലാതാക്കാന്‍ കഴിയും സെന്റ്‌ സേവ്യേഴ്‌സിലെ പ്രിന്‍സിപ്പല്‍ പറയുന്നു.

ചില വിദ്യാര്‍ത്ഥികള്‍ ഇതിനെ സ്വാഗതം ചെയ്യുമ്പോള്‍ ഒരു കൂട്ടം പേര്‍ ഇതിനെതിരെ ശബ്ദമുയര്‍ത്തുകയാണ്‌. സുരക്ഷ വര്‍ധിപ്പിക്കുമെങ്കിലും ഇത്‌ പണത്തിന്റെ ദുര്‍വിനിയോഗമാണെന്നാണ്‌ മറ്റൊരു കൂട്ടര്‍ പറയുന്നത്‌.

സുരക്ഷാ ഭീഷണികള്ക്കും തീവ്രവാദികള്‍ക്കുമെതിരെ സദാസമയവും ജാഗരൂകരാകേണ്ട ഇന്ത്യന്‍ സാഹചര്യത്തില്‍ ഇത്തരം ഒരു ചുവടുവെയ്‌പ്‌ സ്വാഗതാര്‍ഹമാണെന്നും അഭിപ്രായങ്ങളുണ്ട്‌.