ലാലു പ്രസാദ്‌ രാജ്യം കണ്ട മികച്ച റയില്‍ മന്ത്രി: റാബ്‌റി

പട്‌ന: രാജ്യം കണ്ട ഏറ്റവും മികച്ച റയില്‍വേമന്ത്രിയാണ്‌ തന്റെ ഭര്‍ത്താവ്‌ ലാലുപ്രസാദ്‌ യാദവെന്ന്‌ ആര്‍ജെഡി നേതാവ് റാബ്‌റി ദേവി. ചൊവ്വാഴ്‌ച ലാലുപ്രസാദ്‌ അവതരിപ്പിച്ച അഞ്ചാം റയില്‍വേ ബജറ്റിനോട്‌ പ്രതികരിക്കുകയായിരുന്നു അവര്‍.

നഷ്ടത്തിലായിരുന്ന റയില്‍വേയെ തുടര്‍ച്ചയായി വന്‍ ലാഭത്തില്‍ എത്തിച്ചിരിക്കുകയാണ്‌ ലാലു. ഇത്‌ അദ്ദേഹത്തിന്റെ കഴിവാണ്‌ വെളിവാക്കുന്നത്‌. ഇന്ത്യ കണ്ട ഏറ്റവും മികച്ച റയില്‍വേ മന്ത്രിയാണ്‌ താനെന്ന്‌ ഇതുവഴി അദ്ദേഹം തെളിയിച്ചിരിക്കുകാണ്‌-റാബ്‌റി പറഞ്ഞു.

ലാലുവിനെ ബീഹാറിന്റെ റയില്‍വേമന്ത്രിയെന്ന്‌ വിളിച്ചവരെ പ്രതിപക്ഷ നേതാവ്‌ കൂടിയായ റാബ്‌റി പുച്ഛിച്ചു തള്ളി. ലാലുജി ബീഹാറിന്റെ മാത്രം മന്ത്രിയല്ല അദ്ദേഹം ഇന്ത്യയുടെ മന്ത്രിതന്നെയാണ്‌. വനിതകള്‍ക്ക്‌ റയില്‍വേയില്‍ ജോലി സംവരണം ഏര്‍പ്പെടുത്തണമെന്ന തന്റെ നിര്‍ദ്ദേശം അംഗീകരിച്ചതില്‍ എനിയ്‌ക്ക്‌ അദ്ദേഹത്തോട്‌ നന്ദിയുണ്ട്‌.

റയില്‍വേ സുരക്ഷാ സേനയില്‍ സ്‌ത്രീകള്‍ക്ക്‌ അഞ്ച്‌ ശതമാനം സംവരണമാണ്‌ ലാലു പ്രഖ്യാപിച്ചത്‌. ഇത്‌ തീവണ്ടികളില്‍ യാത്രചെയ്യുന്ന സ്‌ത്രീയാത്രക്കാരുടെ സുരക്ഷ ഉറപ്പുവരുത്താന്‍ സഹായിക്കും. ഏറെക്കാലമായി ഞാനീ ആവശ്യം അദ്ദേഹത്തിന്‌ മുന്നില്‍ വെച്ചിട്ട്‌. അദ്ദേഹം അത്‌ പരിഗണിച്ചതില്‍ സന്തോഷമുണ്ട്‌- റാബ്‌റി പറഞ്ഞു.

ബന്ധപ്പെട്ട വാര്‍ത്തകള്‍