അറവുശാലകള്‍ക്ക് നിയന്ത്രണം

തിരുവനന്തപുരം: മലിനീകരണം സൃഷ്ടിക്കുന്ന അറവുശാലകള്‍ക്ക് കര്‍ശനമായ നിയന്ത്രണം കൊണ്ടുവരുന്നതിന് സര്‍ക്കാര്‍ തീരുമാനിച്ചതായി തദ്ദേശ സ്വയംഭരണ മന്ത്രി പാലൊളി മുഹമ്മദ് കുട്ടി നിയമസഭയില്‍ പറഞ്ഞു.

അറവുശാലകളില്‍ നിന്നുള്ള അവിശിഷ്ടങ്ങള്‍ അശ്രദ്ധമായി പുറത്തു കളയുന്നത് സംസ്ഥാനത്തെമ്പാടും മലിനീകരണത്തിന് കാരണമാവുന്നുണ്ട്. അറവുശാലകള്‍ക്ക് ലൈസന്‍സ് നല്‍‍കുന്നതിന് മതിയായ മാലിന്യ നിക്ഷേ സംവിധാനമുണ്ടെന്ന് ഉറപ്പുവരുത്തും.

അറവുമൃഗങ്ങളുടെ അവശിഷ്ടങ്ങള്‍ അശ്രദ്ധമായി കളയുന്നത് സംസ്ഥാനത്തെ പുഴകള്‍ക്കും കനാലുകള്‍ക്കും ഭീഷണിയായിട്ടുണ്ട്. ഇത് തടയുന്നതിന് കര്‍ശനമായ നടപടി സ്വീകരിക്കാന്‍ ഉദ്യോഗസ്ഥര്‍ക്ക് നിര്‍ദേശം നല്‍കിയിട്ടുണ്ട്.

30 മൈക്രോണിനു താഴെ കനമുള്ള പ്ലാസ്റ്റിക് സഞ്ചികള്‍ക്ക് കഴിഞ്ഞ സപ്തംബര്‍ മുതല്‍ ഏര്‍പ്പെടുത്തിയ നിരോധനം ഫലപ്രദമാണ്. 30 മൈക്രോണിനു താഴെ കനമുള്ള പ്ലാസ്റ്റിക് സഞ്ചികള്‍ നിര്‍മിക്കുന്നതും വില്‍ക്കുന്നതും ശിക്ഷാര്‍ഹമാണ്.

നിരോധനം ഫലപ്രദമാക്കുന്നതിന് നഗരപ്രദേശങ്ങളില്‍ 72,177 റെയ്ഡുകള്‍ നടത്തുകയും 17,919 കിലോഗ്രാം പ്ലാസ്റ്റിക് സഞ്ചികള്‍ പിടിച്ചെടുക്കുകയും ചെയ്തിട്ടുണ്ട്. 20 കേസുകള്‍ രജിസ്റ്റര്‍ ചെയ്യുകയും 5.33 ലക്ഷം രൂപ പിഴയായി ചുമത്തുകയും ചെയ്തിട്ടുണ്ട്.

ബന്ധപ്പെട്ട വാര്‍ത്തകള്‍